"Asko daukagu borrokatzeko"
'Faxismoaren eta espainolismoaren aurrean, ikasleok desobedientzia' lelopean herri eskolak ari da egiten Oarso Bidasoko Ikama.
Faxismoaren eta espainolismoaren aurrean, ikasleok desobedientzia lelopean herri eskolak ari da egiten Oarso Bidasoko Ikama. Pasaia-Lezo Lizeoan egin dute topaketa, eta egun osoko egitaraua antolatu dute.
Peru Gorrotxategi Ikamako kideetako bat da, eta hark HITZAri kontatu dionaren arabera, erreakzio faxistak indar handia hartu duela ikusi dute. “Egoera global bat ari da ematen azken urteetan. Erreakzio faxista indar handia ari da hartzen, eta munduan zehar gertatzen den bezala, Euskal Herrian ere eragiten digu horrek”.
Ildo horretatik, nabarmendu du Euskal Herrian ere gorakada hori bistakoa dela, eta hezkuntza eremura ere iritsi dela izan “irakasle faxistekin” edota beste zenbait modutara, “euskararen aurkako oldarraldiarekin”, kasu.
Hori horrela, hilaren 12a euskal ikasleentzako jai egun inposatu bat dela aldarrikatu asmo dute gaurkoan: “espainiar estatuak inposatzen digun jai egun arrotz bat da, eta jai egun hau ez dela gurea aldarrikatu nahi dugu Faxismoaren eta espainolismoaren aurrean, ikasleok desobedientzia lelopean”. Hartara, helburu argia du gaurko topaketak: “egun arrotz honi” zein faxismoaren gorakadari eta hezkuntzan horrek duen eraginari erantzutea.
Gaurko eskualde topaketan 50bat ikasle elkartu dira, eta ongi etorria egin ondotik Ikamak produzitu duen dokumentalaren proiekzioa eta mahai ingurua izan dituzte. Ikasle antolakundearen historian oinarritutako ikus entzunezkoa izan da bertaratutakoek ikusi dutena, eta eguerdi partean propaganda tailerrari ekin diote, 13:30ean kalejira antifaxista egingo baitute. “Meipiraka joango gara kalejira antifaxista deitu diogunarekin, eta bidean ekintza ezberdinak egingo ditugu”, dio Gorrotxategik. Egunari amaiera emateko, azkenik, bazkaria eta bingo musikatua izango dituzte.
Ikasleak elkartu eta antolatzeko espazioa
Gorrotxategi pozik da gaurko eguna izaten ari den erantzunarekin: “Antolakuntzarako espazioa sortu dugu ikasleok elkartzeko asmoz. Oso garrantzitsua da hori, izan ere erreakzio faxista honi edota inposatzen dizkiguten hezkuntza sistemei ikasleok modu antolatu batean erantzun beharko diegu, komunitatean. Hezkuntza sistema propio publiko eta komunitario bat lortu nahi dugu, elkarrekin antolatu beharko dugu”.
Ikamakoak, azkenik, Oarso Bidasoko ikasle guztiak deitu ditu Ikamarekin antolatzera, “asko daukagu borrokatzeko”.
