Gau Beltza egingo dute Hondarribian
Euskal Herriko ohitura zaharrak herriko kaleak hartuko ditu datorren urriaren 31n. Egun horretan desfilea egingo dute Alde Zaharretik, baina aurreko egunetan askotariko tailerrak izango dira, adibidez, kriseiluak eta kalabazak egiteko.
Euskal Herriko udazkeneko tradizioetako bat da Gau Beltza. Urriaren 31n egiten da. Sasoiaren aldaketarekin, gauarekin, mitologiarekin eta komunitatearekin du lotura ohitura zaharrak. Herri askotan ospatzen da festa, eta aurten lehen aldiz Hondarribian ere egingo da.
Udalak azaldu duenez, urte hasieran Gau Beltzaren inguruko hausnarketa egin zuten udalaren Euskara Mahaian. Bileran euskal tradizioekin eta tokiko kultur ondarearekin lotutako ospakizuna egiteko eta sustatzeko beharra sentitu zuten, eta hala jaio da Hondarribiko Gau Beltza.
Euskara Mahaiak Muliateko Auzo Elkartearekin eta Saindua-Gaztelekuarekin batera ondu du egitaraua. Hiru gunetan banatuko da festa, eta gune bakoitzak egitarau zehatz bat izango du. Alde batetik, Muliate auzoan 16:30eatik aurrera haur eta familiei zuzendutako jarduerak izango dira, hala nola ipuin kontaketa, beldurraren tunela eta mozorro lehiaketa. Beste aldetik, Saindua-Gaztelekuan 18:00etatik aurrera gazteei bideratutako ekintzak egingo dituzte, adibidez, beldurraren etxea eta txokolatada.
Bukatzeko, Alde Zaharrean 19:30eatik aurrera Gau Beltzaren desfilea egingo dute kaleetatik barrena argiak itzalita. Ekitaldi nagusia Gipuzkoa Plazan izango da, kantuz, dantzaz eta musikaz gidatuta.
Urriaren 31n bada ere egun handia, aurretik motorrak berotzeko aukera egongo da, urriaren 13tik hasita tailer desberdinak antolatu baitituzte:
- Emeki Elkartearen lokalean:
- Urriaren 13an, 10:00etan: kriseiluak egiteko tailerra.
- Urriaren 14an: 18:00etan: kriseiluak egin eta aurpegiak margotzen ikasteko tailerra.
- Muliaten:
- Urriaren 23an, 17:00etatik aurrera: kriseiluak eta Gau Beltzerako jantziak prestatzeko bi tailer.
- Kultur Etxean, 103. gelan:
- Urriaren 30ean, 17:30ean: Gipuzkoa Plazako ekitaldian erabiliko diren kalabak prestatzeko tailerra.
Lehen aldiz kalabazek, trapu zaharrek eta suak Hondarribiko kaleak hartuko ditu, baina ez dute nahi bakarra eta azkena izan dadin. “Aurten lehen hazia ereingo dugu, eta datozen urteetan guztion artean zaindu eta errotu beharko dugu”, esan du Gazteria eta Hezkuntza zinegotzi Lupe Queirugak. Horregatik, Euskara Mahaiari, Muliate Auzo Elkarteari eta hezkuntza komunitateari eskerrak emateaz gain, herritarrak animatu ditu datorren urriaren 31an kalera atera eta ospakizunean parte hartzera.
