Zaldunborda Berri eta Higertoki enpresen aurkako kereila penalaren proposamena udalbatzara
Bi enpresek ia 14 milioi euroko demanda ezarri zioten udalari, proiektuak bertan behera uztearen "kalte ekonomikoengatik". Udalak aurkeztutako dokumentazioa aztertu du eta "inkoherentzia larriak" topatu ditu.
Hondarribiko Udalak gaur arratsaldeko, asteazkena hilak 30, osoko bilkurara eramango du Higertoki eta Zaldunborda Berri enpresen aurkako kereila penalaren proposamena. Bi enpresek ia 14 milioi euroko demanda aurkeztu zuten orain urtebete udalaren kontra. Auditoria batek erreklamazioko dokumentuak aztertu ostean, “inkoherentziak” aurkitu ditu, eta udalak ohar bidez jakinarazi du kereila proposamena aurkeztuko dutela, “lehentasuna diru publikoa” delako.
Ia hamarkada bateko afera da gaur arratsaldean erabakiko dutena. 2017an enpresek salerosketa kontratu bat sinatu zuten, baina azkenean Zaldunbordako makro outletaren proiektua bideraezina izan zen, 2019-2023ko EAJren gobernuak osatutako HAPOan akats batzuk topatu eta plana baliogabetuta geratu zenean. Enpresek argudiatu zuten bertan behera uzteak kalte ekonomikoak eragin zizkiela, eta horregatik, udalari eta jada deseginda dagoen Hondarribia Lantzen udal-sozietateari 13.795.026 euro erreklamatu zizkieten.
Horren aurrean, udalak auditoria bat jarri zuen martxan, “aurkeztutako dokumentazioa egiaztatzeko eta erreklamatutako kopuruak benetakoak eta behar bezala justifikatuak” zirela argitzeko. Bada, auditoria eginda, ondorioztatu dute erreklamatutako gastuen ia %92 gurutzatutako eta elkarren artean loturak dituzten sozietateen arteko barne-fakturetatik datozela. Era berean, dokumentazio horretan hainbat “irregulartasun larri” aurkitu dituzte.
Inkoherentziak
Alde batetik, faktura batzuk topatu dituzte, zeintzuek agerian uzten duten gastu horien kontratuetako jatorrizko fakturetan bat ez datozen datak eta zenbatekoak. Beste aldetik, gastu batzuk lurrak eskuratzearekin lotutakoak dira, nahiz eta dokumentazioaren arabera, lurzoru horiek jada esleituak eta erosiak zeuden. Hirugarrenik, faktura batzuk justifikatzeko ordainketak egin eta urte batzuetara egindako ziurtagiriak antzeman dituzte, zeinak “zalantzan” jartzen duten ordainketaren unean fakturak existitzen ziren ala behar bezala justifikatuak zeuden. Eta bukatzeko, auditoriak “aldeak” topatu ditu aitortutako zenbait kobrantzen eta ordainketen eta banku mugimenduen artean.
Azterketaren emaitzak kontuan hartuta, Hondarribiko Udalak kereila penala aurkeztuko du osoko bilkuran. “Ia 14 milioi euroko diru publikoaz ari gara. Gure betebeharra da gure burua eta hondarribiarren interesak defendatzea”, esan du udalak. Kereila penala jartzea udalbatzan onartu behar da, eta hortaz, alderdi politikoei proposamena babesteko eskatu die, “herritarren interesak defendatzeko”.
