Stadium Galek 100 urte beteko ditu
Larunbatean, irailak 19an, da urteurrena. Real Unionek Mirandesen aurka jokatuko du partida larunbatean 18:45ean, eta Echandia Gal familiak jaurtiko du ohorezko sakea.
Gal Stadiumean jokatuko dute finala. Ez dira beti ospatzen 100 urte, eta horregatik, gogotsu espero dute irundarrek larunbata, hilak 19. Izan ere, Stadium Galek mendea beteko du. Real Union taldearen etxea da 1926tik; urte hauetan guztietan bere lekua egin du hirian, baina baita Euskal Herriko futbolaren munduan ere.
1926ko irailaren 19an inauguratu zuten, Salvador Echandia Gal irundarrak lurrak eman ostean. Echandia Gal Irungo enpresari ospetsua zen, Porcelanas Bidasoa eta Perfumería Gal saltokien sortzailea, hain justu. Azkar batean zelaia Rea Unioneko txuribeltzen etxe bilakatu zen, zeinak ordura arte Amuteko auzoan entrenatu zuen. Eta horrela egun arte. “Garai ezberdin asko bizi izan ditu Stadium Galek 100 urte hauetan, poliki-poliki hobetzen joateko”, esan du Igor Emery Real Union klubeko lehendakariak, Irunero aldizkariak jaso duenez.
Berreraikitze faseak izan ditu zelaiak, eta belodromoa, kontzentrazio esparrua eta beste hainbat gauza ere izan da. Dena den, Emeryren arabera, “historia” mantendu” du, “belaunaldi garrantzitsu askoren” topaleku bilakatuta. Cristina Laborda alkateak ere zelaiaren garrantzia azpimarratu du: “Gal ez da soilik futbol zelai bat, baizik eta irundar askoren etxea. Bertan garaipenak, porrotak, igoerak eta jaitsierak bizitu dira, baita hiriak izan dituen futbol arratsalderik garrantzitsuenak ere”.
Larunbatean Real Unionek Mirandesen kontra jokatuko du partida, 18:45ean, baina mendeurrena ospatzeko, Echandia Gal familiak botako du ohorezko sakea. Era berean, bezperan, hilak 18, Carlos Fernandez de Casadevantek zelaiaren historia azaltzeko hitzaldia emango du Oiasso museoan, 19:00etan.
