CBA Kultura eta Sorkuntza Zentroak urtebete bete du
Kultura proposamenez beteriko urtea izan da; 66 jarduera egin dira, horietatik asko musika emanaldiak eta ikuskizunak.
“Sortzeko, esperimentatzeko, topatzeko eta parte hartzeko” sortu zen orain urtebete CBA Kultura eta Sorkuntza Zentroa. Bada, esan eta egin. Kultura proposamenez beteriko lehen urtea izan da. Guztira 66 jarduera egin dira, horietatik 26 tokiko artista eta taldeen eskutik.
Urtebetean artearen adar anitz lantzeko aukera egon da zentroan, zehazki: 26 ikuskizun, 25 kontzertu, zazpi zinema proiekzio, sei emanaldi sorkuntza garaikidearekin loturikoak eta bi erakusketa. “Zenbat jarduera garatu ditugun bezain garrantzitsua da CBAn beren lana erakusteko, sortzeko, beste artista batzuekin topo egiteko edo publiko berrietara hurbiltzeko espazio bat aurkitzen ari direnak”, esan du kultura zinegotzi eta Irungo alkateorde Nuria Alzagak.
Alzagaren arabera, espazioak askotariko aukerak eman ditu, adibidez, zuzeneko musika saioak egin, sorkuntzari eta kulturari buruz hausnartu eta baita proiektu profesionalak bultzatu eta lagundu ere. Lehen urtemuga azpimarratzekoa izan bada ere, bide beretik jarraitzeko asmoa erakutsi du Alzagak: “Gero eta irundar gehiagok CBA hurbileko eta eguneroko leku gisa sentitzea nahi dugu. Kulturaz gozatzeko, baina baita ideiak eta proiektu berriak sortzeko ere. Espazioa berezi egiten jarraituko dugu; hemen kultura ez delako bakarrik erakusten, sortu, pentsatu eta partekatu ere egiten delako”.
