Egun batez margolari izateko aukera
Soroetako frontoian egingo duten murala margotzeko gonbidapen irekia egin dute, irailaren 14tik 16ra, 16:30etatik 20:00etara. Muralak "auzoaren eta herriaren izaera" islatuko du.
Hasi besterik ez omen da egin behar zerbait berria probatzeko. Oraingo honetan pinturan barneratu nahi duenaren aukera izango da. Datorren irailaren 14tik 16ra Soroetako frontoiko horman marraztuko duten murala margotzeko aukera egongo da, 16:30etatik 20:00etara.
Alejandro Elduayen eta Alvar Melkart Gutierrez artistek marraztu dute murala. Artearen munduan ibilitakoak dira txikitatik eta horrek batu ditu. Askotariko teknikak probatu dituzte, hala nola koadroak eta tatuajeak. Kasu honetarako pintura plastikoa eta grafiti teknikak erabiliko dituzte.
Bi artistek udalarekin batera antolatutako ekimena da, eta herritar guztiak gonbidatu dituzte egun horietan frontoira gerturatzera eta horman “auzoaren eta herriaren izaera islatuko duen artelana egitera”.
