Motorrak martxan herri lasterketetarako
Datorren urriaren 4an izango da Bidasoa ibaian zehar egiten den Txingudi Korrika lasterketa, Hendaian hasi eta Hondarribiraino. Bestalde, antolakuntzak bat egin du Donibane Lohizuneko Donibaneko Bost lasterketarekin; honako hau irailaren 20an izango da eta 5 kilometrokoa da.
Korrikalariak, Irungo Colonen sartzen. Beroketak egiten hasiko jada nor edo nor, hilabete eskas besterik ez baita falta Inmobiliaria Urme Txingudi Korrika herri lasterketarako, datorren urriaren 4an izango da. 27. edizioa egingo dute aurten. 10 kilometroko ibilbidean korrikalariek Txingudiko badia gurutzatuko dute, Hendaian hasi, Irundik igaro eta Hondarribiraino.
Izena eman daiteke jada, Kirolprobak plataformaren bitartez. Urriaren 2ra arteko epea dago parte hartzeko. Era berean, lasterketak gaztetxoagoentzako bertsioa ere badu. Lasterketa handiaren bezperan izango da, urriaren 3an, Gal Stadiumaren inguruan, eta 1 eta 13 urte bitartekoei zuzenduta dago.
Lankidetzan Donibaneko Bost lasterketarekin
Aurten nobedade batekin dator herri lasterketa, bat egin baitu Donibaneko Bost lasterketarekin. Super Amara Bat Bidasoko Atletiko Taldeak jakinarazi du.
Donibaneko Bost Donibane Lohizunen egiten den 5 kilometroko herri lasterketa da. Donibane Lohizuneko eta PBA Pays Basque Athlétisme [Euskal Herriko Atletismo] taldeak antolatzen dute. Diotenez, “aukera ezin hobea” da herritarrek lehen aldiz lasterketa batean parte hartzeko, baina baita marka pertsonalak bilatzeko ere.
Datorren irailaren 20an izango da eta izena ematea online egin behar da. Halaber, Txingudi Korrikan bezala, Donibane Lohizunekoak ere badu txikientzako aukera. 1,2 kilometroko lasterketa da eta 10 eta 13 urte bitartekoek hartu dezakete parte.
