Alardea feminista bilakatzeko behar beste baliabide jartzeko eskatu du LABek
Jaizkibel konpainiaren sortzaile eta bultzatzaileei euren eskerrik beroenak helarazi dizkiote ohar bidez Alardearen bezperan.
Jaizkibel konpainiaren 29. edizioko irudi bat. Imanol Saiz Gomez de Segura Bihar goizean izango da Hondarribiko Alardea, eta ordu batzuk geratzen direnean LABek udal alarde publiko eta feminista bakarraren alde egin du. “30 urte pasa dira Irun eta Hondarribiko emakume* batzuek gizonek dituzten eskubide berberak egin eta euren herrietako alardeetan parte hartzen saiatu zirenetik, hots, emakumeek* ere jaietan modu aktiboan parte hartu ahal izateko bidea hartu zutenetik”.
Prentsa oharrean diotenez, ekintza hark “pauso bat gehiago” ekarri zuen emakumeen eskubideen aldeko borroka feministan. Bide horretan, diote argi esan behar dela emakumeen parte hartze librerik gabe jaiak ez direla parekideak ezta askeak ere. “Kaleak emakumeenak* ere badira, horregatik, egunerokoan eta jaietan libre izateko eta ibiltzeko emakumeen* eskubide osoa aldarrikatzen dugu. Ezin dugulako onartu halako diskriminaziorik espazio publikoan, ezta emakumeen* aurkako halako biolentziarik ere”.
Bestalde, kontatu dute hogeita hamar urtez “ukazio, gatazka, biolentzia, irain eta ezeztatze politikoa” ezagutu dutela, eta oraindik ere ez dela “konponbidearen bidean jarriko gaituen ekinbide argirik egin Irunen. Hondarribian ere egitasmoak ez dira sekulakoak izan, hala ere, azken urteetan izan den udal gobernu berriak aurrerapauso txikiak egin ditu. Hala ere, Alarde baztertzaileak, eta horiek babesten dituzten alderdi politiko eta enparauak, emakumeak* espazio publiko eta politikoan normaltasunez aritzearen kontra dabiltza urterik urte. Esku hartze garbirik egon ez izana, bere horretan, emakumeen* zapalkuntzari gorazarre egitea da, eta, beraz, klase zapalkuntza betikotzea. Aldiz, Irunen ez bezala, Hondarribian aldaketarako zenbait urrats izan dira azken hiru hamarkadetan borrokan aritu diren emakumeei* esker”.
Mugimendu feminista, “eraldaketaren ikur nagusi eta bakarra”
Era berean, gaineratu dute 2023ko Udal eta Foru hauteskundeen ondoren Hondarribian aldaketarako aukerak zabaldu zirela, baina “balizko normaltasun baterako bidean urrats txikiak” eginagatik ere azken asteetako berriek “argi” utzi dute “aurtengoan ere mugimendu feminista dela eraldaketaren ikur nagusi eta bakarra”. Hortaz, LABek Jaizkibel konpainiari elkartasun osoa helarazi nahi izan dio. Hots, “ekidinezina den parekidetasuneranzko bidean trabak jartzen dituzten ente erreakzionarioen jarrera baztertzaileei gaitzespen gogor eta irmoa egin nahi die LABek”.
Horretaz gain, sindikatuak nabarmendu du aldaketa bazterketa sustatzen duten horiek egin behar dutela, eta haien jarrerak berdina izaten jarraitzen badu, mugimendu feministaren koordenadetatik abiatutako esku hartze instituzional irmoa egon behar dela. “Beraz, eskaera zehatza egin nahi du LABek: alardea udalak antola dezan bidea berreraiki beharra dago eta, era berean, feminista bilakatzeko behar beste baliabide jarri behar dira”.
Azkenik, eskerrak emateko aukera probestu nahi izan dute: “Lortutako aurrerapenak eta askatasunak arriskuan diruditen garai nahasiotan, udal alarde publiko eta feminista bakarraren alde antolatzen eta borrokatzen dabiltzanei, eta, bereziki, Jaizkibel konpainiaren sortzaile eta bultzatzaileei gure eskerrik beroenak helarazi nahi dizkiegu. Ez gaude lanean, etxean, kaleetan, jaietan ezta alardea ere bazterkeriak onartzeko prest!”.
