Bertako Produktuen Astea egingo dute irailaren 28tik urriaren 4ra bitarte
Heldu zein haurrei zuzendutako hamahiru jarduera antolatu ditu Hondarribiko Udalak beste hainbat eragilerekin batera, tokiko produktuen eta ekoizleen "lana eta garrantzia" ezagutarazteko asmoz. Doan dira ikastaroak, baina aurretik izena eman beharko da; irailaren 14ean jarriko dira eskuragarri sarrerak.
Tokiko ekoizleen lana ezagutarazi, tokiko produktuen kontsumoa sustatu eta lehen sektoreak herrian duen garrantzia azaltzea da Bertako Produktuen Astearen helburua. Irailaren 28tik urriaren 4ra bitarte izango da, eta, adin guztientzako ikastaroen eta jardueren bitartez, herritarrek bertako produktuen mundua ezagutu ahal izango dute. Hondarribiko Udalak antolatu du., Hondarribiko Azoka, Hondarribia Abian eta Bidasoa Bizirik eragileekin elkarlanean.
“Bertako Produktuaren Astea ez da soilik bertako produktuak ezagutzeko edo dastatzeko astea; gure herriko ekoizleen lana, ahalegina eta jakintza aitortu eta balioan jartzeko aukera ere bada”, azaldu Hondarribiko Udaleko zinegotzi Estitxu Urtizbereak. Zinegotziaren hitzetan, “garrantzitsua” da bertakoa kontsumitzea, “ingurukoen lana babestea, ekonomia indartzea eta tokiko gastronomia zaintzea” delako. Horregatik, udalak hamahiru proposamen antolatu ditu.
Askotarikoak izango dira jarduerak, irakurleak udalaren webgunean aurkituko ditu zehaztasunak. Besteak beste, haurrek ogia eta azenario pastela egiten ikasi ahal izango dute, eta eskulanak egiteko tartea ere edukiko dute; helduek eztiaren ekoizpena ezagutuko dute, baita gazta tarta egiten ikasi ere; eta familientzako jarduerak ere izango dira.
Jardueretan parte hartzea doan da, baina aldez aurretik izen eman behar da. Hori egiteko epea datorren irailaren 14tik 20ra bitarte egongo da zabalik eta webgunetik bertatik egin ahal izango da.
