Behar Bidasoak diru laguntza kanpaina egingo du Kolonbiara dirua bidali eta lurrikararen kalteak konpontzeko
Gobernuz kanpoko erakundeak Pasionisten Kongregazioko Ahizpei bideratuko die dirua, zeinarekin urteak daramatza elkarlanean.
Abuztuaren 10ean Kolonbian jazotako lurrikararen kalteak. Pare bat aste igaro dira 7,4 graduko lurrikara batek Kolonbiako mendebaldea astindu zuenetik. Gutxienez 331 pertsona hil eta 4.000 pertsona baino gehiago zauritu ziren hondamendian. Mende erdian herrialdean jazo den lurrikararik gogorrena izan da. Erreskate lanak amaituta, orain kalte materialak konpontzeko prozesuan daude herritarrak, 31.000 etxebizitza suntsitu eta beste milaka eta milaka kaltetuta geratu zirelako abuztuaren 10 hartan. Ildo horretatik, Hondarribiko Behar Bidasoa gobernuz kanpoko erakundeak diru laguntza kanpaina abiatu du. Elkarteak ekarpen ekonomikoak zuzenean Pasionisten Kongregazioko Ahizpei bideratuko dizkie.
Pasionisten Kongregazioko Ahizpek Pereira hirian duten proiektuari laguntzeko bilduko du dirua erakundeak; hiri hori bera izan zen kaltetuenetako bat. Behar Bidasoak azaldu duenagatik, 20 urte daramatzate ahizpekin lanean, “egoera zaurgarrian” dauden “haur, emakume, adineko eta familiei” laguntzeko, ludoteka edota jantoki soziala bezalako zerbitzuak eskainita. Lurrikararen ondorioz, ordea, espazio horiek kaltetuta geratu dira, eta nahiz eta ahizpak “normaltasunera” itzultzeko ahaleginetan badaude ere, oraindik konponketak falta dira.
Leihoetan eta teilatuan kalteak daude; teilatuan, adibidez, arrakalak daude eta euria sartzeko arriskua dago. Era berean, kalteek eta hondakinek gaixotasunak eragin dituzte, hala nola ur kutsadura. Kutsatutako ura edateak osasun arazoak sortu ditu, adibidez, oka egitea edo beherakoa izatea. Laburrean, kalte materialak egoteaz gain, osasun arazoak pairatzen ari dira Kolonbiako herritarrak.
Gauzak horrela, Behar Bidasoak laguntza ekonomikoa bideratzeko kanpaina ireki du. Herritarrek honako kontu korrontera bidali beharko dute dirua, Ayuda Pereira kontzeptuarekin: ES19 2095 5086 10 9101924570. Era berean, erakundeak eskerrak eman dizkie orain arte proiektuan lagundu dutenei.
