Alardeko konpainien koloreekin desfilatu ahalko dute Jaizkibelgo kideek
1996ko gertakarien 30. urteurrenaren hartutako erabakia da Jaizkibel konpainiak iragarritakoa, 'Herriaren Alardea da' lelopean.
Jaizkibel konpainiak berritasun bat iragarri du: aurten, konpainiako kideek, haiek sentitzen duten konpainiaren koloreekin desfilatzeko aukera izango dute. 30 urte pasa dira emakumeak lehen aldiz Alardean ateratzeko saiakera egin zutenetik, Kale Nagusiko atari hartatik Kosta konpainian sartu zirenetik. Hurrengo urtean Jaizkibel konpainia sortu zen, eta harrezkeroztik bere bidea egin du.
Urtemuga oinarri hartuz iragarri dute konpainiako kideek aurten hartutako erabakia. “Urtemuga hau gogora ekarri nahi dugu nondik gatozen ez ahazteko, baina baita zubiak eraiki eta elkarrekin aurrera begiratzen jartzeko ere”, adierazi du konpainiak. Esan dutenez, jaiak, ezer baino lehen, “elkartzeko egunak dira”, kaleak eta etxeak senidez eta lagunez betetzen diren egunak, eta “Alardeak ere, jaien erdigunean taupaka dabilen bihotz indartsu horrek, hala beharko luke izan”.
Beraz, bere sentimenduak Arkolla, Beti Gazte edota Akartegi konpainian dituenak, adibidez, Jaizkibelen konpainia horietako jantziekin desfilatzeko aukera izango du aurten. “Kolore horiek bizi, sentitu eta gure eginez ere erakusten dugulako jaia denona dela, eta elkarrekin egoteak aberastu egiten gaituela. Alardea, konpainiak, koloreak, espazioak eta jaiak herritarronak direlako, eta horietaz ere gozatzeko eta horiek erabiltzeko eskubidea dugulako, neska zein mutil izan”.
Helburu argiak
Herriaren Alardea da leloarekin aurkeztu dute erabaki berri hau. Konpainiako kideek adierazi dute Alardea “guztiona” dela, eta berdintasunak “ez duela ezer kentzen, gehitu baizik”. Konpainiaren helburua festa herritarrengana, denengana, hurbiltzea da, emakumeak ere Alardean atera daitezen.
