Iritsi dira Saharako haurrak uda Bidasoan igarotzera
Udalak ongietorria egin die Saharako errefuxiatuen kanpamendutik etorritako lau haurrei eta haiek hartu dituzten familiei. Uda batek haien errealitatea "alda ez badezake" ere, azpimarratu dute horrelako ekimenek "itxaropena" pizten dutela.
Hondarribiko Udaleko ordezkariek harrera egin diete uda igarotzera etorri diren Saharako haurrei.Hondarribiko Udala Igerilekuan jolasteko, lagun berriak egiteko edota gutxienez giro freskoagoan egoteko. Tindufeko errefuxiatuen kanpamendua atzean utzita, beste urte batez, Mendebaldeko Saharako haurrak udaz gozatzeko prest iritsi dira Bidasora. Tadamun elkartearen eta Oporrak Bakean programaren bitartez, aurten lau haurrek igaroko dute uda herrian. Orain egun batzuk iritsi ziren eta pasa den ostiralean egin die harrera udalak udaletxean.
Hondarribiko alkate Igor Enparanek azpimarratu du ekimena “elkartasunaren, lankidetzaren eta nazioarteko elkarlanaren isla” dela: “Programa honi esker lasaitasuna, maitasuna eta etxe baten beroa ere eskaintzen zaizkie”.
Hondarribiko zinegotzi Lupe Queirugak ere Oporrak Bakean programaren “balio sozial” eta “humanitarioa” nabarmendu ditu. “Uda batek ezin du haien errealitatea aldatu, baina itxaropena eta bizipen zoriontsuak eskaini ditzake”, esan du zinegotziak. Are, gaineratu du herria haurrentzat soilik ez, haurrak ere “onuragarriak” direla herriarentzat, eta beraz, ekimenak “aldebiko aberastasuna” dakarrela: “Gure komunitatea ere aberastu egiten da, haur hauengandik ikasi egiten dugulako eta elkartasuna eguneroko ekintza txikien bidez eraikitzen delako”.
Horiek horrela, alkate zein zinegotziak harrera familien konpromisoa goraipatu dute. “Harrera familien eskuzabaltasunari esker haurrek aste batzuetan bizi duten errealitate gogorra albo batera utziko dute”, eskertu diete bertaratu diren familiei. Bukatzeko, alkatea haurrei zuzendu zaie eta adierazi die udaletxea “hondarribiar guztien etxea” den bezala, “bisitan etorritako haurrena ere” badela.
