Itziar Basterretxearen 'Erraietatik saretzen' erakusketa, ikusgai
Paperezko eta kartoizko sei maskarak osatzen dute bilduma, eta identitateren, emozioaren eta generoaren inguruko hausnarketara bultzatzen du.
Itziar Basterretxea Seijoren Erraietatik saretzen erakusketa jarri dute Maddalen Arte Gunean. Artistak berak azaldu duenez, sorkuntza prozesu pertsonal eta kolektibo baten emaitza da erakusketa, eta sei maskarak osatzen dute berau. Are; lan bakoitzak eguneroko bizipenetan, emozioetan eta emakume izatearen esperientzian oinarritutako hausnarketa bat proposatzen du.
Maskara horiek paperarekin eta kartoiarekin egindakoak dira, eta “eguneroko tentsioak, kontraesanak eta emozio konplexuak forma bisual bihurtzen dira, ikusleari gertuko esperientzia bat eskainiz”.
Era berean, nabarmendu dute proiektuaren abiapuntua iiingles taldearen Erraietakoa diskoko kantuak direla, eta erakusketak identitateren, emozioen eta generoaren inguruko begirada kritikoa proposatzen duela. “Maskarak ez dira soilik objektu estetikoak, baizik eta emakumeek egunerokoan jasaten dituzten rol, itxaropen eta presio sozialen isla”.
Sei maskara, sei gai
- Judizioaren begirada: emakumeek espazio publikoetan jasaten duten etengabeko begirada kritikoa.
- Errautsetatik ondoren: gatazken ondorengo arrasto emozionalak eta aurrera egiteko zailtasuna.
- Aniztasuna: sororitatearen eta harreman sareen indarra eta zaintza.
- Nigan bizi dena: barne ahotsaren zalantzak eta adierazteko beldurra.
- Aterpe desioak: galera, memoria eta irauten duten loturen inguruko hausnarketa.
- Ur azpian: identitatearen galera eta eraldaketa esperientzia sakon baten ondoren.
Proposamen artistikoa musikarekin lotu asmoz, uztailaren 11n Kasino Zaharrean lehen aldiz elkartuko dira maskarak eta kantuak, irudiak eta soinuak, argiak eta itzalak. iiingles taldeak emango du kontzertua hitzordu horretan.
Hala ere, erakusketa uztailaren 10era bitartean bisitatzeko aukera egongo da ostiraletan (18:00-20:00), larunbatetan (18:00-20:00) eta igandeetan (12:00-14:00).
Amaiera ekitaldia, berriz, uztailaren 11n izango da, 11:00etan. Maddalen Arte Gunean hasiko da topaketa, eta Arman Plazan amaituko da.
