Igor Enparan: "Agintaldi planean jasotakoen %88 bukatuta edo martxan daude"
Igor Enparan alkateak agintaldiaren errepasoa egin du. Udal gobernua "hitzetatik ekintzetara" pasa dela nabarmendu du.
Igor Enparan alkatea, kale nagusian. Igor Enparan alkateak agintaldiaren errepasoa egin du. Ekainaren hasieran bete ziren hiru urte Abotsanitz alkatetzara iritsi zenetik; 2023ko abenduan EH Bildurekin akordioa egin zen udal gobernua osatzeko. Enparanek nabarmendu du agintaldi planean jasotako ekintza eta jardueren %88 egin direla, edo martxan daudela: %58 egin dira, %30 abian dira, eta %12 egiteke daude. Urtebete falta da agintaldia bukatzeko. Era jarraian gobernu programaren bilakaeraren berri emateko konpromisoa hartu zuen udal gobernu taldeak, eta adierazpenok horren harira egin ditu alkateak bideo bidezko emanaldi zuzen bitartez; joan den ostegunean eman zituen argibideak, sei hilabetean behineko maiztasunari eutsiz.
Udal agintariaren arabera, agintaldiaren hasieran konpromiso bat hartu zuen udal gobernu taldeak: “Hitzetatik ekintzetara” pasatzea. “Datuek erakusten dute norabide horretan aurrera egin dugula, baina baita legealdian sortu diren behar berriei erantzuteko gaitasuna izan dugula ere”.
Arloka xehetu ditu Enparanek egindakoak. Etxebizitzan, mugikortasunean, hirigintzan, ondarean, merkataritza eta ekonomian, kultura eta euskaran, ingurumenean, berdintasunean, gazterian, hezkuntzan, edp kirolean egindakoak aurkeztu ditu. Asko izan dira eman dituen azalpenak, arlo bakoitzaren gaineko zehaztasunekin. Atal ekonomikoari arreta berezia jarri dio udal agintariak balantze horretan.
Alkateak esandako denak jarraian den bideoan ikus-entzuteko aukera dago.
