'Busti zaitez' kanpaina egingo du ADEMGIk igandean
Esklerosi Anizkoitzari ikusgarritasuna eman asmoz, stand bat jarriko dute San Pedro kalean, eta merchandisinga erosteko aukera egongo da.
ADEMGIk Zarautzen egindako azoka boluntarioko irudi bat. Instagram @ademgi_emigipuzkoa AFEMGIk Esklerosi Anizkoitzagatik egiten duen Busti zaitez kanpainaren 29. edizioa egingo du Hondarribian uztailaren 5ean (igandea da). Erakundeak berak Gipuzkoan egiten duen “gizarteratze eta sentsibilizazio kanpainarik garrantzitsuena” da, eta herritarren bertaratzea eskatu dute.
Igandeko hitzorduak zenbait helburu ditu: batetik, gaixotasun neurologiko horrek aurkezten dituen arazoengatik gizartea sentsibilizatzea eta informatzea, eta, bestetik, Gipuzkoako Esklerosi Anizkoitza Elkarteak gaixotasuna pairatzen duten pertsonentzako eskaintzen dituen birgaitze zerbitzuak finantzatzeko dirua lortzea.
Uztailaren 5ean stand bat jarriko dute San Pedro kalean, eta bertan Katuki Saguyakik 29. edizio horretarako diseinatutako produktuak eskura daitezke. Hori, baina, ez da laguntzeko aukera bakarra, dohaintza egiteko aukera ere egongo baita egun horretan. Gainera, sare sozialetan ADEMGI etiketatzeko eta #bustizaitez2026 erabiltzeko deia luzatu dute, horrek ere laguntzen baitu.
Esklerosi Anizkoitza duten 750 pertsona
ADEMGIren datuen arabera, Gipuzkoan 750 pertsonak dute Esklerosi Anizkoitza, Euskal Autonomia Erkidegoan 2.600 pertsonak eta, Espainiar Estatuan, berriz, 55.000 pertsonak.
Era berean, jakinarazi dute trafiko istripuen ondorioz Esklerosi Anizkoitza gazten zein helduengan garatzea ohikoa dela.
Azkenik, “elkarteari beharrezko baliabide ekonomiko eta materialak emateko, gaixotasuna jasaten duten pertsonei eskaintzen zaizkien birgaitze zerbitzuak finantzatzeko eta beren bizi kalitatea hobetzeko” laguntzeko eskatu diote Hondarribiari.
