Amonan Txikhotiak irabazi ditu 2026ko Hondarribiko Olinpiadak
Olinpiaden hirugarren belaunaldiko laugarren urtea osatu dute Hondarribiko gazteek. Zortzi proba egin dituzte, eta besteak beste, Korto Lehiaketa estreinatu dute.
Amaitu dira Olinpiadak. Hirugarren belaunaldiko laugarren urtea egin dute. Zortzi proba izan dira totalean, eta berritasunen bat haien artean. Korto Lehiaketa egin dute lehen aldiz, eta aurrera begira, errepikatzeko asmoarekin dabiltza herriko gazteak. Amonan Txikhotiak irabazi du aurtengoa, Amonan Xalda Berua taldeari jarraipena hartuz.
1986 . urtean iritsi ziren Olinpiadak Hondarribira, garaiko gaztetxeko kideen eskutik. Hernanitik ekarri zuten ideia, eta urte askoz herriko asteburuak bete zituzten kirol ezberdinekin. Urteak aurrera joan ahala, Olinpiaden formatua aldatzen joan zen. 2014. urtean, Gazte Xaiaren ekimenez berreskuratu zituzten, eta 2017ra luzatu ziren. 20 urteko tarte baten ondoren itzuli ziren urte haietan Olinpiadak, eta hondarribitar askok oroitzapen asko gogorarazi zituzten.
Mendi proba, Itsas proba, Parodiak, Euskara proba… hainbat alor ukitu dituzte urtero moduan. Abenduan, Lore Jokoen programazioaren barruan sartu ziren Olinpiadak, adibidez, eta urtero moduan, Parodiak egin zituzten, herritar asko Gipuzkoa plazan bilduz. Kanpo proba ere errepikatu dute aurten, eta Hernanin izan ziren, bertako Olinpiadetako partaideekin proba eguna partekatzen. Zehazki, azken proba hori irabazi zuen Amonan Txikhotia taldeak, eta horregatik bereganatu dute kasko bikingoa (Olinpiaden saria).
Belaunaldi aldaketa
Hirugarren belaunaldiak Hondarribiko Gaztetxea izan zuen oinarri. Bertan sortutako talde txiki batek bultzatuta, eta ondoren batutakoen laguntzaz egin dituzte jada lau Olinpiada. Aurrera begira, erronka nagusiena argi dute: belaunaldi berriak antolakuntzan sartzea. Komite Olinpikoak lan handia du horretan, eta askotan errepikatu izan dute horretarako erreferentziazko leku baten beharra dutela.
Beraz, hurrengo urtean, egongo da Olinpiadarik? Hurrengo hilabeteetan jakingo da galdera horren erantzuna.
