Sutondoan bezala, goxo
Euskarazko tokiko hedabideek hitza hartu zuten ostiralean, OARSO BIDASOKO HITZAren papereko edizioaren 1.000. zenbakiaren harira antolatutako solasaldian.
OARSO BIDASOKO HIITZAren papereko edizioaren 1.000. zenbakiaren harira, Oarsoaldeko eta Bidasoko euskarazko tokiko hedabideek hitza hartu zuten atzo (hilak 15, ostirala) Lezoko Gezala Auditoriumean. Antxeta Irratiko Aitziber Zapirain Etxanizek, Oiartzun Irratiko Alazne Etxeberria Oiartzabalek, eta OARSO BIDASOKO HITZAko Urko Etxebeste Petrirenak euren jardunaren gainekoak azaldu zituzten Urtzi Urkizu Adrian kazetari eta idazlearen gidaritzapean. Gezalako besaulki denak ez ziren bete. Baina giro goxoa izan zen, sutondokoa.
Herritarrak, eragileetako ordezkariak, arduradun politikoak (Oarsoaldeko lau alkateak, adibidez), HITZAkideak, hedabidearen kolaboratzaileak, HITZAko langileak eta beste zenbait izan ziren solasaldian. Ordubete inguruko solasaldian euskarazko tokiko hedabideen izaera zein den jakin zuten ikus-entzuleek, baita komunikabide horiek dituzten erronken, indarguneen, egiteko eraren edo komunitatearekin hazteko nahiaren berri ere. Nola ez, hizlari bakoitzak atzera begirakoa egin zuen ordezkatu zuen hedabidea nola sortu zen esateko, baita haiek horietara nola iritsi ziren azaltzeko ere. Bitxikeriak kontatzeko tartea ere izan zuten, Urkizuren eskaerei jarraiki.
Solasaldiaren ondoren beste mahai-inguru bat hasi zen, kasu horretan pintxoz eta tragoskaz hornitutako mahaien bueltan izan ziren hitz eta pitz Gezalara hurbildu zirenak. Atzokoarekin HITZAren asmoa baitzen hedabideak inguruan duen komunitatea edo konplizeen sarea elkartzea
HITZAk solasaldi osoaren grabazioa egin zuen. Datorren astean publikatuko du ikus-entzunezkoa. Jarraian, atzoko hainbat uneren irudi sorta.
