Erbesteko biktimak omendu dituzte Ficoban
Laugarrenez egin dute ekitaldia, eta Irun eta Etorbide zubia memoria demokratikoa berreskuratzeko erreferentziazko leku bihurtu nahi izan dituzte.
Atzo, hilak 8, Ficoban erbesteko biktimak oroitzeko ekitaldia egin zuten hiriak “memoria demokratikoarekin duen konpromisoa” erakutsi aldera.
Ekitaldia Lurdes Maldonadok gidatu zuen, eta saioan zehar musika, dantza edota bideo bat ikusteko aukera izan zuten bertaratu zirenek.
Horretaz gain, Angel Victor Torres Lurralde Politikako eta Memoria Demokratikoko ministroa izan zen Espainiako Gobernuaren izenean ekitaldi instituzionalera joan zena, baina memoria demokratikoarekin lotutako agintariak eta ordezkari publikoak zein zenbait erakundetako kideak ere elkartu zirela jakinarazi du Irungo Udalak.
Omenaldian Cristina Laborda Irungo alkateak hartu du hitza, eta jarraian Maria Jesus San Jose Eusko Jaurlaritzako Justizia eta Giza Eskubideetako sailburuak, Alda Blanco omendutako familien ordezkariak, Carlos Blanco Aguinagaren alabak eta Torresek egin zuten hitzartzea.
Ficobako ekitaldiaren aurretik, baina, udalbatzak, Laborda alkatea buru zuela, harrera instituzionala egin zion Torres ministroari udaletxeko areto nagusian.
