Espazio publikoa irisgarriago egiteko, lanak San Pedro eta Beleztarren Markes kaleetan
Espazio publikoaren irisgarritasuna bermatzea eta ostalaritza jarduerarako baldintzak erraztea dira obren helburuak. Hamar egunean amaitzea aurreikusi dute.
Hondarribiko Udalak San Pedro kalean eta Beleztarren Markes kalean “espazio publikoa irisgarriagoa” egiteko lanak hasi ditu. Azaldu dutenez, lanak udalerriko terrazen ordenantzaren garapenaren barruan kokatzen dira, eta bi helburu nagusi ditu: espazio publikoaren irisgarritasuna bermatzea eta ostalaritza jarduerarako baldintzak erraztea, hurrenez hurren.
Hori horrela, Estitxu Urtizberea Hirigintza zinegotziak azaldu du neurri hori herritarren parte hartze prozesuan jasotako ekarpen baten emaitza ere badela: “Terrazen ordenantza egiteko prozesuan alegazio bat jaso genuen, eta ontzat jo genuen, irtenbide erabilgarri eta orekatua delakoan”.
Azaldu dutenez, lanen bidez oinezkoentzako ibilbide irisgarri berriak egokituko dituzte lurzoruan baldosa podotaktilak jarriz. “Elementu horiek funtsezkoak dira ikusmen desgaitasuna duten pertsonentzat; izan ere, norabidea antzematen eta oztopoak aurrez identifikatzen laguntzen dute, kalean modu autonomo eta seguruan mugitu ahal izateko”, gehitu dute.
Urtizberea: “Indarrean dagoen espazio publikoen irisgarritasun baldintzei buruzko araudiak ezartzen du oinezkoentzako ibilbideak jarraituak, seguruak eta irisgarriak izan behar dutela, bereziki ikusmen arazoak dituzten pertsonentzat. Horregatik, fatxadaren ondoko espazioa libre mantendu behar da –gutxienez bi metro–, eraikinen lerroa erreferentzia eta orientazio elementu nagusietako bat baita pertsona horientzat”.
Alabaina, zinegotziak azpimarratu du araudiak aukera ematen duela terrazak fatxadetara gehiago hurbiltzeko, baldin eta oinezkoentzako ordezko ibilbide irisgarri bat modu argi, seguru. eta egokian bermatzen bada. Horregatik, Hondarribiko Udalak lanketa teknikoa egin du, eta ondorioztatu irisgarritasuna bermatuko duen luzetarako gidak egingarriak direla San Pedro eta Beleztarren Markes kaleetan. “Obra honi esker, alde batetik, oinezkoentzako ibilbide irisgarria bermatuko da, eta bestetik, San Pedro eta Beleztarren Markes kaleetako ostalaritza establezimenduek terrazak fatxadetara gehiago gerturatzeko aukera izango dute”, amaitu du zinegotziak.
Obrak martxan dira dagoeneko, eta hamar eguneko epean amaitzea aurreikusi dute.
