Erakusketa areto irisgarriak eskatu ditu EAJk
Jeltzaleen ustez Maddalen Arte Guneak ez ditu irisgarritasun baldintzak betetzen, eta beste aukera batzuk azter daitezela nahi du.
Maddalen Arte Gunearen sarrera. Hondarribiko EAJk erakusketa areto irisgarriak eskatu ditu. Herrian erakusketetarako prest den Maddalen Arte Guneak ez dituela irisgarritasun baldintzak betetzen uste du, “ez du irisgarritasun unibertsala bermatzen”, eta horregatik gobernu taldeari eskatu dio beste aukera batzuk azter ditzala, “herritar guztientzat irisgarria, irekia eta egokia izango den erakusketa areto baten alde lan egin dezala”. Herrian alternatibak badirela uste du alderdiak.
Jeltzaleek adierazi dute badela urtebete Maddalen Arte Gunearen irisgarritasunaren gaineko kezka azaldu zuela, eta udal gobernuaren partetik jasotako erantzuna izan zela “behin-behineko irtenbidea zela” eremu horrena. “Gaur egongo egoerak erakusten du ez dela horrela izan, espazioak programazio egonkorra eta urte osorako plangintza duelako. Ez da konpondu irisgarritasun falta bezalako arazo nabarmen bat. Kulturarako sarbidea herritar guztientzat bermatua egon behar da”.
EAJk tokiko artista eta sortzaileen aldeko apustua berretsi du, baina adierazi du haiek euren lanak ezagutarazteko espazio egokiak behar dituztela: “Maddalenek espazio muga handiak ditu, eskaileren erdian batiago, eta horrek zaildu edo ezinezko egiten du mugikortasun murriztua duten pertsonen sarbidea”.
