Elektroplaza jaialdiak Urdanibia plaza hankaz gora jarriko du
Maiatzaren 23an, jaialdiaren hirugarren edizioa egingo dute eta askotariko erritmoak izango dira, nazioarteko figura ezagunek eta bertako talentuak uztartuta.
Gaur aurkeztu dute Elektroplaza jaialdiaren hirugarren edizioa. Aurtengoa, maiatzaren 23an izango ohiko topagunean, Urdanibia plazan. Jaialdi “arrakastatsu” honek musika elektronikoaren arloko nazioarteko figura ezagunak zein Euskal Herriko talentua uztartuko ditu. House doinu finak eta techno kartsu eta biziak nahastuko dituzte hainbat DJk, hala nola, eskualdeko Irune Muguruzak eta JOTAk. Biek ala biek egungo euskal elektronikoaren esentzia direla azpimarratu dute aurkezpenean.
Bi artista horiek egunari hasiera emango diote. Muguruzak House eta Minimal erritmoak fusionatuko ditu, eta JOTAk, berriz, audientzia handiekin konektatzeko gaitasuna duen artista dela erakutsiko du. Bi artista hauen egitekoa bukatutakoan, nazioarteko artisten txanda helduko da. E. Lina Ukrainako underground eszenako diziplinarteko artista bat da, eta freestyle dantzaren musika eta mugimenduak izen handiko agertokieta taularatu ditu. “Kameleoi musikala” da askorentzat, eta Panorama Bar, Amnesia eta Dimensions Festivalean izan da. Egunari amaiera emateko Dyed Soundoromek, Parisko undergroundeko figura esanguratsuak, soinu sakon, psikodeliko eta guztiz groovy jarriko du.
Sandra Caballero Hezkuntzako eta Gazteriako ordezkariak musika elektronikoko jaialdia Irunera ekartzearen garrantziaz hitz egin du. “Apustu irmoa egin dugu, jaialdi arrakastatsu batez ari gara”. N97 kolektiboak jaialdiaren antolaketan lagundu. Kolektiboa Muguruzak eta JOTAk 2023an sortu zuten Bidasoa Behereko adierazpide komunitario gisa, “festarako eskubidearen alde” egiten duena.
Maiatzaren 23ko hitzordu handia berotzeko bihar, hilak 10, Konekta Sessions egitasmoaren bigarren saioa egingo dute Urdanibia plazan. Musikaren arloan hasi berri direnek aukera izango dute beren pasioa eta gustu musikalak eszeneratzeko. Bigarren saioaren protagonistak Landerm, Nea, Txouman eta J-303 & Soki izango dira. Saioa 17:30ean hasi eta 22.00ak arte luzatuko da.
Maiatzaren 29an, 18 eta 30 urte arteko gazteei zuzendutako beste saio bat egingo dute, eta bertan parte hartzeko izen ematea dagoeneko ireki dute udal webgunean.
