'Via Irun - Hiria gara' erakusketak harrera beroa izan du
Martxoaren 23tik ikusgai dago CBAn, eta udalak aurreikuspenak bete ditu eta dagoeneko 1.300 hiritar baino gehiago joan dira.
Via Irun proiektuak hiria goitik behera eraldatuko du datozen urteetan. Gipuzkoako hiri-berroneratze proiektu handiena izango da, eta egungo trenbidearen eremua eraldatuko du. Proiektua hiritarrei gerturatzeko eta ahalik eta modu ulergarrian azaltzeko martxoaren 23an Via Irun – Hiria gara erakusketa martxan jarri zuten CBAko Ireki Art aretoan, eta hilaren 18ra arte ikusgai egongo da. Momentura arte, erakusketak “harrera beroa” izan du.
Udalaren egitasmo honek aurreikuspenak bete ditu. Erakusketa jarri zutenetik, 1.300 pertsona inguru joan dira datozen urteotan egingo duten proiektuari buruz informatzea eta zalantzak argitzea. “Interes handia” dagoela baieztatu du alkateak, eta xehetasunak ahalik eta era zehatzenean azaltzeko bisita gidatuak ere antolatu dituzte egun hauetan zehar. “Proiektu hau gure iraganarekin lotzen gaituen etorkizuna da”.
Bisita gidatuez gain, martxoaren 24an saio informatiboa antolatu zuten CBAko Irun Zuzenean aretoan hiri-berroneratzearen xehetasun teknikoak azaltzeko. Cristina Labordak eta Sergio Javierrek, Hiri Garapenerako ordezkariak, gidatu zuten. Ehun pertsonentzat lekua duen aretoa goraino bete zuten hiritarrek.
Hilaren 18ra arte, denbora izango dute erakusketa bisitatzeko eta proiektuaren nondik norakoak gertutik jakiteko. Orain arte izan duen harrera dela eta, udalak bisita gidatuen eskaintza handitzea erabaki du. Erakusketari buruzko informazioa udal webgunean kontsulta daiteke.
