Udaberrian ere irundarrek kultur eskaintza zabala izango dute
Gaur aurkeztu dute apirileko eta maiatzeko kultur ekitaldien programazioa, eta musika, dantza eta bestelako jarduerak izango dira protagonista datozen egunotan.
Udaberrian haziak landatzearekin batera, kulturak ere bere haziak landatuko ditu Irunen datozen egunotan. Gaur aurkeztu dute apirileko eta maiatzeko kultur proposamenen egitaraua, zabala eta publiko guztiarentzat. Guztira 25 proposamen inguru izango dituzte irundarrek, tartean, CBAn egingo dituzten Geltoki Topaketak. Horrez gain, kontzertuak, dantza emanaldiak, Dokuiruneko eta Zure abenturaren bila programako saioak eta antzezlanak izango dira.
Aurtengo Geltoki Topaketak Irungo kutsua izango du, Maria Martin soprano irundarrak parte hartuko baitu maiatzaren 29an CBAn, 19:00etatik aurrera. Topaketak informalak eta inspiratzaileak izango dira, eta bertan parte hartzen duten artisten barruak ezagutzeko aukera izango dute bertaratzen direnek. Proposamen irekiak dira, herritarrentzat zein musikaren, arte eszenikoen eta bestelako diziplina artistikoen profesionalentzat.
Urtero hutsik egiten ez duten hitzorduak ere izango dira, hala nola, Barra Klasikoaren Dantza Eguna, hilaren 18an, edota Irun Hiria musika bandaren kontzertua, hilaren 19an. Eraiki Dantza Taldeak ere maiatzaren 23an kurtso amaierako emanaldia eskainiko du Amaia KZn, 18:30ean hasita.
Apirilerako eta maiatzerako aurreikusitako proposamen kulturalen egitaraua udalaren webgunean eskuragarri izango dute.
Aurkezpen ekitaldian, Nuria Alzagak kulturako ordezkariak Amaia KZ-ko 2025. urteko datuak ere eman ditu. Guztira 344 jarduera antolatu zituzten iaz, eta haietara 53.745 ikusle joan ziren. Jarduera horien artean 27 jardueratan sarrera guztiak saldu ziren. Azken urteetan lortutako zifrarik handienak dira, 2024an 266 jarduera eta 43.077 ikusle bertaratu baitziren. “Beti gaude Irungo eskaintza kulturala aberasten duten espresio artistiko berrien bila”.
