Telefono bidezko arreta emateko zerbitzuak 300 deitik gora jasotzen ditu egunean
2025eko datuak jaso dituzte, eta guztira 19 segundo inguruko 91.101 dei jaso zituen zerbitzuak iaz, azken urteotako batazbestekoaren gainetik.
2012an, o1o eta 943 50 51 52 telefono bidezko arreta emateko deiaren zerbitzua martxan jarri zuen udalak. Ordutik, milioi bat dei baino gehiago jaso ditu zerbitzuak, eta berriki 2025eko datuak argitaratu dituzte. Iaz, guztira 91.101 deia jaso zituen, eguneko 300 dei gutxi gorabehera. Herritar askok erabiltzen dute zerbitzua, eta udalak adierazi duenez zalantzak argitzeko edo izapideak eta informazioa eskatzeko bide bilakatu da. Zalantzak argitzeko herritar batek behar duen bataz besteko denbora 19 segundokoa baino ez da izango.
Udalaren telefono bidezko deiak kudeatzeko ardura Gureak taldeko Datapost enpresarena da, informazioaren eta komunikazioaren arloan espezializatutakoa. Herritarrak “pozik” dira zerbitzuak duen arretaren azkartasunarekin eta egindako kontsulten ebazpen mailarekin. Urtero biltzen dituzten inkesten arabera, 5tik 4,6 puntu jaso ditu zerbitzuak. “Zinez pozgarria da, halaber, herritarrek zerbitzua oso modu positiboan baloratzen dutela jakitea, eta lanean jarraituko dugu hobetu beharreko guztia hobetzeko”, adierazi du Gaizka Iriarte Gureak Dataposteko zuzendariak.
Kontsulten artean, erabiliena edo herritarrek gehiagotan eskatutakoa udalaren informazioa lortzekoa izan da, %46,6a. Horren baitan, kultur agendaren, dirulaguntzen, programen edota udaleko izapideei edo udal tasei buruzko informazioaren gaineko kontsultsak izan dira. Bestalde, izapidetza dakarten deiak (%12,8) eta udalarekin bat ez datozen informazio eskaerak egiteko deiak (%16) ere jaso dituzte. Azkenik, gainerako deiak udalaren telefonogunearen funtzioei lotutakoak izan dira, hain zuzen, %21,9a.
Deien gehiengoa 09:00etatik 14:00etara izan dira, eta hilabetei dagokionez, udaberrian zein udazkenean bildu dituzte dei gehien, hilabete horietan pilatzen baitira udalaren kanpaina nagusiak. Zerbitzua 08:00etatik 19:00etara martxan dago astelehenetik ostiralera, eta 08:30etik 13:30etara larunbatetan. Zerbitzu honek herritarrekiko komunikazio eraginkorra eta inklusiboa bermatzea du helburu.
