Irungo feministek eta emakumeen elkarteek azken egunotan izandako indarkeria kasuak gaitzetsi dituzte
Azken egunotan, Berrizen eta Basaurin izandako indarkeria matxista kasuak gaitzesteko elkarretaratzea egingo dute San Juan plazan, 19:00etan.
Irungo feministek eta emakumeen elkarteek azken egunotan, Bizkaian izandako indarkeria matxista kasuak gaitzetsi dituzte. Irungo Emakumeen Etxea elkartea, Txingudiko Elkarte Feminista, Lumak Haize, Uxoa, Argoiak, Gaurko Andreak eta Bidasoko Emakumeak elkarteek enegarrenez indarkeria matxista salatzeko adierazpena argitaratu dute.
Pasa den asteazkenean, gizon batek bikotekidea indarrez erail zuen Basaurin (Bizkaia), indarkeria matxistak aurten Euskal Herrian erail duen bigarren emakumea izan da. “Amorrua sentitzen dugu indarkeria matxistak eraildako Amaiaren familiari, lagunei eta gertukoei babesa adierazteko autodefentsarako deia egiten dugu”.
Bestalde, atzo, hilak 6, Berrizen (Bizkaia) gizon bat atxilotu zuten bikotekidea labana batekin hiltzen saiatzeagatik. Euskal Herriko Emakumeen Mundu Martxak hilketa saiakera gaitzetsi du, eta era berean nabarmendu du ez dela gertaera bakan bat izan.
“Jarrera matxista guztiak erabat gaitzetsi behar ditugu, eta lanean jarraituko dugu erabateko berdintasuna bermatzen duen gizarte baten alde eta emakumeen aurkako indarkeriarik gabeko gizartearen alde”. “Bada garaia jarrera eta diskurtsoa aldatzeko, gure haurrak indarkeria matxistaren aurkako jarrera izan dezaten”. Azken egunotan, Euskal Herrian izandako indarkeria matxistak eragindako kasuak gaitzesteko gaur, hilak 7, elkarretaratzea egingo dute San Juan plazan, 19:00etan.
