EH Bilduk udalaren erabakia gaitzetsi eta Euskal Jira sustatzeko deia egin du
Pasa den astean, udalak hartutako erabakiaren aurrean PSE-EEk eta EAJk Euskal Jiraren antolakuntza aldebakarrera bereganatzeko erabakia gaitzetsi du EH Bilduk.
Azken astean, Irungo Euskal Jira bolo-bolo egon den gaia izan da. 2026ko Euskal Jira ezbaian egon da azken hilabeteetan, eta pasa den astean udalak iragarri zuen Euskal Jiraren antolakuntzeko ardura beregain hartuko zuela. Lasaitasun mezua helarazi nahi izan zien herritarrei, aurten ere aukera izango baitute Euskal Jiraz gozatzeko. EH Bilduk, ordea, udalaren erabakia gaitzetsi du. Alderdiaren ustez, Euskal Jiraren antolakuntza aldebakarrez bereganatzeko erabakiaren gainean hausnartzera deitu ditu PSE-EE eta EAJ.
Euskal Jiraren antolakuntzaren gaia aspalditik datorren kontua da. Azken urteetan, kultura sustatzen duten elkarteek trabak besterik ez dituzte izan hirian jarduerak antolatzeko eta aurrera eramateko. “Irungo nortasunaren eta historiaren parte izan arren, ez dirudi udalak oztopo horiek bideratzeko elkarlana bideratuko duenik”. Euskal Jirak hiritarren parte hartzea eta komunitatea sustatzeaz gain, Irungo kultur sarea indartzen duela adierazi dute. “Irungo Udalak lan hori babestu eta sustatu beharrean, kezkaz hartu dugun erabakia jakinarazi zuen atzo: Euskal Jiraren sustatzaileek mahai gaineratutako zailtasunei muzin egin, eta aldebakarrez Euskal Jiraren antolaketa bereganatzea”, gaitzetsi du EH Bilduk.
“Erabaki honek ez du soilik Irungo kultur sarea ahultzen, berezkoa duten izaera komunitarioa eta parte hartzailea desagerrarazten dute. Egoera okerrera egin duela esan daiteke”. Euskal Jira elkarteak urteetan egindako lana eskertu dute, eta udal gobernuari eskatu diote elkarte eta eragileen aliatu gisa joka dezala, kultura bultzatzen duten elkarteekin errespetuzko harremanak eraiki daitezen.
