"Trans pertsona guztien eta haien inguruneen ongizatea sustatuko duen gizarte konpromiso iraunkor bat izan behar da"
Trans ikusgarritasunaren nazioarteko egunaren harira, Irungo Udalak adierazpen instituzioanala argitaratu du. Gaur, gainera, udaletxea argiztatuko dute.
Trans ikusgarritasunaren nazioarteko eguna da gaur, hilak 31, eta adierazpen instituzionala argitaratu du Irungo Udalak horren harira. “Egun hau funtsezkoa da trans pertsonen errealitatea, duintasuna eta eskubideak aitotzeko, bai eta gizartea sexu eta/edo genero identitateagatiko edozein diskriminazio moduren aurrean sentsibilizatzen jarraitzeko ere”.
Udaletik diotenez, azken urteetan “aurrerapen nabarmenak” egin dira “transen eskubideen aitorpen juridikoan, bai nazioartean, bai estatuan eta autonomian. Alde batetik, trans pertsonen berdintasun erreal eta eraginkorrerako eta LGTBI eskubideak bermatzeko legea, eta, bestetik, genero identitateagatik ez baztertzeari eta Euskadin trans pertsonen eskubideak aitortzeari buruzko 4/2024 legea onartzea urrats sendoa izan dira legezko berdintasuna sendotzeko bidean”.
Alabaina, gehitu dute aipatutakoa “modu eraginkorrean” aplikatu behar dela. “Trans pertsona guztien eta haien inguruneen ongizatea sustatuko duen gizarte konpromiso iraunkor bat izan behar da. Ikusgarritasuna ez da soilik gai sinboliko bat: babesteko, aitortzeko eta gizartea eraldatzeeko tresna bat da. Trans errealitatea ikusaraztea lagungarria da aurreiritziei aurre egiteko, estereotipoak desmuntatzeko eta bizitzako esparru guztietan ingurune seguruak sortzeko. Ikusgarritasun horrek belaunaldi guztiak hartu behar ditu barne, trans txikien, helduen eta adinekoen esperientziak aitortuz, eta horietako bakoitzak babesa, errespetua eta laguntza egokia izatea bermatuz”.
Hori horrela, Irungo Udaletik trans pertsonen eskubideak “defendatzeko eta sustatzeko” konpromisoa berretsi dute, bai eta behar dutenei laguntza eta babesa ematekoa ere.
Honela amaitu dute adierazpena: “Aniztasunak gizarte gisa indartzen gaitu. Pertsona guztien eskubideak bermatzea ez da aukera bat, erantzukizun kolektibo bat baizik”.
Udaletxea, argiztatuta
Trans ikusgarritasunaren nazioarteko egunaren harira, Irungo Udalak udaletxea trans banderaren koloreekin argiztatuko du. NAIZEN elkarteak egin du eskaera, adingabe transexualen familien elkarteak, hain zuzen.
Eraikina koloreztatzearen helburua “trans pertsonek eguneroko bizitzan dituzten erronkei buruzko kontzientzia sortzea eta onarpe eta laguntza giroa sustatzea” da.
