Zabalik dago babes ofizialeko 42 etxebizitzetan izena emateko epea
Biteri kalean daude etxebizitza horiek, eta izena eman daiteke Etxebideren webgunearen bidez zein Zuzenean bulegoan, aurrez aurre.
Zabalik da Biteri kalean kokatutako 42 babes ofizialeko etxebizitza eskuratzeko izen emate epea. “Eusko Jaurlaritzako Etxebide zerbitzuak sustatutako etxebizitza hauek Hondarribian etxebizitza eskuragarrien eskaintza handitzeko helburua dute”, eta interesa duten pertsonek maiatzaren 4ra arte eman ahal izango dute izena.
Azaldu dutenez, etxebizitza horiek erregimen orokorreko babes publikoko etxebizitzak izango dira, eta esleipena alokairu edo jabetza baldintzen arabera egingo da, indarrean dagoen araudiari jarraituz. Alabaina, azpimarratu dute izena emateko ezinbestekoa izango dela Etxebiden alta emanda egotea zein ezarritako baldintza guztiak betetzea.
Parte hartzeko bete beharreko baldintzak:
- Errolda. Gutxienez urtebeteko errolda jarraitua izatea Hondarribian, edo azken hamar urteetan bost urtekoa (etenekin). Salbuespenak izango dira mugikortasun murriztua duten pertsonak eta genero indarkeriaren biktima diren emakumeak.
- Etxebideko eskaera. Etxebizitza babestuen eskatzaileen erregistroan alta emanda egotea, alokairu eskatzaile gisa eta Hondarribia udalerria hautatuta. Mugikortasun murriztua dutenek edozein udalerritan eman dezakete izena.
- Diru sarrerak. 2024ko diru sarrera haztatuak 9.000 eta 46.464,29 euro bitartekoak izatea. Salbuespenak egongo dira kolektibo jakin batzuentzat, hala nola desgaitasuna dutenentzat edo genero indarkeriaren biktimentzat.
- Bizikidetza unitatea. Gehienez zazpi kide izatea.
42 etxebizitza horietan izena emateko bi modu daude: Etxebideren webgunearen bidez edota aurrez aurre (Andia kalea 13, Donostia), hitzordua eskatuta.
Hondarribiko Udaletik azaldu dutenez, proiektu hori Visesarekin sinatutako lankidetza hitzarmenaren bidez garatu da, eta bertan adostu bezala, Hondarribiko Udalak lursaila doan uzteaz gain, obraren amaierako kostuaren %15eko ekarpena egingo du, gehienez ere 1.486.784,48n eurora arte.
Ildo horretatik jarraituz, honakoa dio Igor Enparan Araneta alkateak: “Erakundeen arteko lankidetza estuari eta konpromiso partekatuari esker izan da posible proiektu hau. Hain zuzen ere, hori da gure etxebizitza politikaren oinarrietako bat: administrazioen artean lankidetzan aritzea, herritarren beharrei erantzuteko”.
Bide horretan, nabarmendu du egitasmo hori “urrats garrantzitsua” dela eta etorkizuneko garapenetarako abiapuntu izan daitekeela. “HAPOa onartuz gero, elkarlan horren lehen fruitua litzateke. Aurrera begira, beste proiektu batzuetan ari gara lanean, hondarribiar guztiei etxebizitza duin eta eskuragarria eskaintzeko asmoz”.
