Venezuelako egia eta inperioaren gezurrak kontatzeko hitzaldia, bihar
Bidasoko hiru brigadista 'El Maizal' komunan eta Caracaseko '5 de marzo' komunan izan dira Venezuelako egia gertutik ezagutzeko.
Martxoak 8aren harira, sei euskal herritar Venezuelan izan dira Komunetako Herri Kontsulta Nazionala gertutik bizitzeko. Astebeteko bidaia izan da, eta landa inguruko zein hiriko hainbat komuna sozialistetan izan dira. Brigadisten artean, Bidasoko hiru kide egon dira, hain zuzen, Oihana Galardi, Ione F. Zabaleta eta Iker Eizagirre Xufi. Hauekin batera, Olatukoop eta Hernani Burujabeko kideak izan dira. Bertan bizitako esperientziak kontatzeko Venezuelatik bueltan, Bidasoko brigadistekin solasaldia antolatuko dute bihar, hilak 27, Hazia kultur elkartean.
Venezuelako errealitatea gertutik ezagutzeko El Maizal komunako 17. urteurrena ospatzeko aukera izan dute, Ande mendien ateetan. Landa eremuan ez ezik, Caracas hiriburuan dagoen 5 de marzo komunako emakumeen borroka ere ezagutu dute. “Feminismo Komunitarioko kideekin elkarlanean brigadaren parte bat egin dugu, eta horrek aukera eman digu komuna eraldaketa feminista lurraldetik emateko tresna izan daitekeen”.
Egoera horretan, M8ko Herri Kontsulta Nazionalak duen sasoia frogatu dute, bakoitzak bere komunean komunitatearen aldeko proiektu egokiena hautatzeko bozketa egiten dute. “Venezuelak defendatzen duen ereduaren festa izan da, demokrazia zuzena eta protagonikoarena”, adierazi dute brigadistek. Brigadan zehar “franko hitz egin” dute Venezuelak bizi duen setio inperialaren gainean.
Komuneroek, behin eta berriro, Euskal Herriko brigadistei eskatu diete “inperioaren gezurrei aurre egin” eta Euskal Herrian venezuelarron egia kontatzea. Bizipen horiek guztiak gertutik azalduko dituzte bihar, 18:3oetatik aurrera.
“Oztopoen gainetik, irabazi arte!”
