"Adostasunak bilatzera eta zubiak eraikitzera nator, Hondarribia hobe bat denon artean egitera"
Maria Serrano Olascoagak hartuko du EAJren lidertza 2027ko hauteskundeei begira. Ilusioz jaso du kargua, baina "erantzukizun handiarekin".
Atzo iragarri zuen EAJ-k Maria Serrano Olascoaga izango dela 2027ko udal hauteskundeetako alkategai jeltzalea. Alderdiak argi adierazi du “herritarren gertutasuna eta konfiantza berreskuratzea dutela helburu”, eta horregatik, Serrano izan dela aukera egokiena.
Komunikazioa ikasi zuen Serranok Deustuko Unibertsitatean, eta horretan aritu den arren, hiru legealdi egin ditu zinegotzi modura. 2015. urtetik 2023ra arte, hainbat sail lideratu zituen EAJ-ko zinegotziak, hala nola Merkataritza eta Turismoa, Gazteria eta Prebentzio Komunitarioa. “Erabaki honekin, EAJk berrikuntza eta esperientzia uztartzen dituen profilaren alde egin du, gertutasunean, prestakuntzan eta bai udalaren funtzionamenduaren zein Hondarribiko errealitatearen ezagutza sakonean oinarritutako lidergoa ordezkatzen duena”, adierazi du alderdiak ohar bidez.
Serranok ilusioz jaso du kargu berria, baina adierazi du erantzukizun handiko lana dela. “Hondarribia bizi-kalitate handiko herria da, eta horrela baloratzen dute herritarrek. Zaindu eta hobetzen jarraitu behar dugu denon artean. Orain, garrantzitsuena den horretan zentratzeko unea da: herritarren egunerokoan, eta etorkizuneko erronkei seriotasunez heltzea”. Bere politikak markatzeko, argi utzi du “ez datorrela irtenbide errazekin ezta ere titular handiekin” udal hauteskundeetara. “Lan egitera nator, entzutera eta eraikitzera. Adostasunak bilatzera eta zubiak eraikitzera, Hondarribia hobe bat denon artean egiteko.”
“Herriaren zaintza”
Etapa berri bat ireki du EAJ-k, 2023tik hona udal taldea Gonzalo Carrion Txalok bideratu ondoren. Adierazi dute elkarrizketa eta entzutea izango direla garai berriaren oinarri garrantzitsuenetako bat, “egunerokoa eta herritarren benetako beharrak ardatz izanez”. Horren harira, lan ildo nagusienak zerrendatu dituzte:
- Egunerokoaren hobekuntza, herri zainduago baten alde eginez.
- Elkarrizketa eta elkarlaneko espazioak berreskuratzea.
- Herritarren eguneroko arazoei entzun eta erantzutea.
- Etorkizuneko erronkei seriotasunez eta arduraz heltzea, bereziki etxebizitzaren
arloan, ikuspegi errealista eta epe luzekoarekin.
