Irungo haurrek ere euskara lau haizetara zabaldu dute
Haurrek ere Korrikarekin bat egin dute, eta lekukoa eskutik eskura pasa dute Irungo kaleetan barrena egindako Korrika Txikian.
24. Korrikak goizaldean Irungo kaleak bete ditu, eta milaka euskaldunek Korrikarekin bat egin dute. Haurrek ere ez dute hutsik egin euskararen aldeko olatuan, eta ikastetxeek ere euskararen alde egiten duten lana erakutsi dute. Goiz esnatu dira haurrak, eta gogotsu. Lekukoak Leka Enea ikastetxetik Zabaltza plazara arteko bidea egin du, eta ibilbidean zehar hamar ikastetxetako haurrek errepidea bete dute.
Emozioa, irrika eta poza izan dira lekukoak aurrera egiteko bidelagunak. Furgoneta hurbildu ahala, lekukoaren lekualdatzea emozioz beteriko unea izan da, hiriko puntu guztietan. Arranoaren hegaldiarekin bat egin dute, eta aurtengo abestiaren mezua lau haizetara zabaldu dute.
Korrika Txikiaren lehenengo lekukoa Leka Eneako txikitxoenek eraman dute, eta Hondarribia kalean Txingudiko, San Vicente de Pauleko eta Elatzetako haurrek ere Korrika Txikira batu zaizkie. Kolon pasealekura heldu eta Belaskoeneako ikasle gaztetxoenek kalearen zabalera hartu dute. San Juan plazara arteko metroetan Dunboakoak, La Sallekoak eta Eguzkitzakoak izan dira protagonista nagusiak. Ikastetxe bakoitza hainbat taldeetan banatu eta kaleak kolorez bete dituzte. Lekukoa hartzen azkenak Toki Alai eta El Pilarrekoak izan dira.
Zabaltza plazan amaierako ekitaldia egin dute, eta ikastetxe bakoitzeko bi ikasle igo dira lekukoan gordeta zuten mezua irakurtzera. Euskararen aldeko mezuak eta bertsoak bota dituzte ikaslez betetako Zabaltza plazan. Ikasle ausartenak ere aurtengo abestiaren bertsioa kantatzera animatu dira.
Jarraian, HITZAk Korrika Txikian egindako argazkiak:
