Txakurrentzako parke bat eskatu du PSE-EEk
Martxoko Osoko Bilkuran ezatabaidatuko dute animalien ordenantza berria. Sozialistek baiezko botoa emango dute, baina uste dute badirela zehaztu beharreko gauzak.
Hondarribiko Udalaren hurrengo osoko bilkuran, animalien ordenantza berria eztabaidatuko da, beste hainbat punturen artean, eta horren harira, PSE-EEk horren alde egingo duela adierazi du. Sozialisten ustez, beharrezkoa den neurria da onartu beharrekoa, eta beraz, udal gobernuari eskatu dio proiektua denboran gehiago ez luzatzeko.
“Testu zabal eta xehatua da, animalien jabeen eskubideak eta betebeharrak argi eta garbi arautzen dituena, eta, gainera, indarrean dauden ordenantzak eta araudiak integratzen eta eguneratzen dituena”, azaldu dute sozialistek. Horrez gain, adierazi dute “ordenantza herri bizikidetza hobetzeko beharrezkoa dela”, eta “egunerokoan presenteago dagoen errealitate bati erantzuten diola”.
Halere, PSEk esan du oraindik badaudela zehaztu beharreko gauzak. Gauza horien barnean, txakurrentzako parke bat eskatu dute sozialistek, gogoraraziz lehenagotik landutako gaia dela. Udal gobernuak parke hori egiteko zailtasunak aurkeztu izan ditu, baina PSEk argi du egin beharreko zerbait dela, eta azken aurrekontuetan 48.400 euroko partida onartuz, orain landu behar dela.
