Koloneko minbiziaren aurkako topaketa mediko-gastronomikoa egingo dute
Astelehenean, hilak 23, Minbiziaren Aurka Gipuzkoan elkarteak solasaldia eta menu osasungarria antolatuko du Jostallu elkartean, 18:30ean.
Urtero, Minbiziaren Aurka Gipuzkoan elkarteak antolatzen dituen topaketa mediko-gastronomikoak arrakasta handikoak izan ohi dira. Martxoaren 31n Koloneko Minbiziaren Aurkako Munduko Egunarekin bat eginez, urteroko hitzordua antolatuko dute astelehenean, hilak 23, Jostallu elkartean. Topaketa 18:30ean izango da, eta solasaldia eta menu osasungarria prestatuko dute. Jarduera doakoa den arren, izena eman beharko dute interesdunek gipuzkoa@contraelcancer.es helbide elektronikoan edota 943 45 77 22 telefonora deituta.
Koloneko minbizia intzidentzia handiena duen minbizia da gizon zein emakumeen artean, eta topaketan Minbiziaren Aurka Gipuzkoan elkarteko prebentzioko psikologo batek eta digestio arloan espezializatutako Osakidetzako doktore batek parte hartuko dute. “Koloneko minbiziak ez die gizonei bakarrik eragiten, eta uste hori desmitifikatzen ahaleginduko gara topaketan, baita minbiziaren kausa saihesgarriak ezagutu eta gure osasunaz arduratu”. Dieta prestatzeko eta zaintzeko kontuan hartu beharreko jarraibideak azalduko dituzte, eta topaketari amaiera emateko jarraibide horiek jarraituta, ezaugarri horiek biltzen dituen menua prestatuko dute.
