Oro har giro lasaia egon bada ere, zenbait identifikatu egon direla dio LABek
Piketeak egin dituzte goizean, eta LAB sindikatuak jakinarazi du "jarraipen zabala" ari dela izaten greba.
Greba orokorra deitu dute gaur Hego Euskal Herrian ELA, LAB, Steilas, Hiru eta Etxalde sindikatuek 1.500 euroko Lanbidearteko Gutxieneko Soldata aldarrikatzeko, bai eta soldata hori Hego Euskal Herriko erakundeetan erabakitzea exijitzeko ere.
Arratsalderako deitu dituzte mobilizazioak, baina goizean zehar zenbait pikete egin dituzte Oarsoaldeko eta Bidasoko herrietan.
LAB sindikatua da gaurko grebaren deitzaileetako bat, eta, oro har, greba “jarraipen handia” izaten ari dela nabarmendu dute.
Oarsoaldeari dagokionean, LABetik jakinarazi dute industria gutxi gora behera %60 batean itxi dela. Herrietako erdiguneetako komertzioek ere ia erabat itxi dituzte ateak.
Giroa, bestalde, “lasaia” dela nabarmendu dute, nahiz eta tentsio uneak egon diren eta atxilotu bat ere egon den.
Horretaz gain, garraio zerbitzua “nahiko normaltasunez” ari direla ematen gehitu dute LABetik. “Zerbitzu minimoak jarri dituzte, baina ohiko funtzionamendua ari da izaten”, erantsi dute.
Bidasoaren kasuan, LABetik jakinarazi dute oraindik jarraipen datu askorik ez dutela, baina goizean Irungo Gabiria eta Ugalde industriaguneetan piketeak egin dituztela nabarmendu dute. Horietan 50 pertsona inguru elkartu dira, eta sarrera bakoitza hiru ordu laurdenez egon da itxita.
Alabaina, auto karabanak egin dituzte, eta blokeo horiek Hondarribitik abiatu dira. Nazionala blokeatu dute ordu bete inguruan, eta trafikoa “ia guztiz” moztuta egon dela kontatu dute. Hala ere, Ertzaintza bertaratu da gero, eta biribilgunea desalojatzea behartu dituzte. “Poliki izan bada ere, trafikoa ibiltzen hasi da”, diote.
Hori, baina, ez da izan egin duten blokeo bakarra, Irungo Oinaurreko autobideko sarrera ere blokeatu baitute.
Bide horretan, kontatu dute goizeko piketeak “intzidentziarik gabe” joan direla, baina auto karabanetan lau pertsona identifikatu dituztela. “Karabana egiteko baimena eskatuta zegoen, baina hala ere lau pertsona identifikatu dituzte”.
Erdigunean ere, piketeak
Aipatutakoez gain, Mendibil zentro komertzialean piketeak egin dituzte goizean. “Kanpoaldean kontzentrazioa egin dugu, eta gero barrura sartu gara. Hor tentsio uneak egon dira”, diote LABetik. “Ertzaintza kaskoekin sartu da barrura, baina egoera ez da gehiago konplikatu. Ekintza horretan zegoen pertsona bat identifikatu dute, eta gero beste gazte bat ere identifikatu dute bideo bat egiteagatik”, erantsi dute sindikatutik.
Piketeak hamarrak aldera egin dituzte merkatalgunean, eta pozik azaldu dute komertzioak itxita zeudela.
Horretaz guztiaz gain, jakinarazi dute Irungo Kolon pasealekuan bide mozketa bat egin dutela, eta hor kazetari bat identifikatu dutela bideo bat grabatzeagatik. “Kazetari hori kazetari modura identifikatu da, baina berdin-berdin identifikatu dute grabatu izanagatik”.
Jarraipenari dagokionean, zentroko anbulatorioan zerbitzu minimoak daudela diote, eta eskola “ia guztiak” itxita daudela nabarmendu dute, “baita Pio Baroja institutua ere”. Azken horretan piketeak egin dituzte goizean, baina itxita zegoen.
Azkenik, enpresen jarraipenari dagokionean, nabarmendu dute oraindik ez daukatela datu askorik, baina Irungo CAFen batzar lotesle bat egin dutela, eta LABeko delegatuak bertatik pasa direnean “dena itxita” zegoela ikusi dutela. “Irungo Tesa ere enpresa indartsu bat da, eta hor %70 inguruk egin du greba”, amaitu dute.
