Herriko artista eta arte guneen zerrenda digitalak osatu nahi ditu udalak
Herriko artisten zerrenda digitala eta webgunea osatzeaz gain, hiriko arte guneen zerrenda digitala eta plano inprimatua osatzeko deialdia ere zabaldu dute.
Hondarribiko Udalak herriko artisten zerrenda digitala eta webgunea osatzeko deialdia martxan jartzearekin batera, hiriko arte guneen zerrenda digitala zein plano inprimatua osatzeko deia ere abiarazi du. Lehenaren helburua “Hondarribiko talentua bateratu eta ezagutaraztea” da, baita etorkizuneko egitasmo kulturaletarako oinarria sortzea ere. Izan ere, sortuko duten zerrenda horren bidez herriko sormen komunitatea ikusgarri egingo dute, eta hortaz, artista bakoitzaren profila Hondarribia kulturako webgunean jarriko dute herritarrek zein interesa duen orok kultur sarea hobeto ezagutu dezan.
Aipatutako herriko artisten zerrenda digitala eta webgunea osatzeko deialdia diziplina guztietako sortzaileentzat dago zabalik, eta herrian bizi diren eta lotura artistikoa duten sortzaile guztiak gonbidatu dituzte parte hartzera. Ortzi Alonso, kultura zinegotzia: “Hondarribiko sormen komunitatea ikusgarri egitea gure lehentasunen artean dago. Zerrenda honen bidez ezagutza eta harremanak indartu nahi ditugu, eta gure artisten lana balioan jartzeko aukera emango digu. Herritarrek eta interesdunek gure kultura sarea modu erraz eta erakargarrian ezagutu ahal izango dute”.
Bertan parte hartzeko, artista bakoitzak honako datuak helarazi beharko ditu: argazki pertsonal bat, izen abizenak, jaiotze data, jaioterria, biografia laburra eta kontakturako datuak –webgunea, sare sozialak, korreoa eta telefono zenbakia–.
Bestalde, arte guneen zerrenda digitala eta plano inprimatua osatzeko deialdiaren helburua “Hondarribiko sormen ekosistema ikusgarri egitea, arte espazioen presentzia indartzea eta herritarrei zein bisitariei informazio eguneratua eskaintzea” da Alonsorekin aburuz.
Gauzak horrela, arte guneek datu hauek bidali beharko dituzte: espazioaren izena, argazki bat, helbidea, arduradunaren izena, kontaktua, webgunea, sare sozialak, espazioaren deskribapen laburra eta zerbitzu osagarriak.
Zerrenda batera zein bestera apuntatu nahi duenak, eskatutako datuen gain, baimen orria sinatuta bidaldi beharko du datuak eta irudiak webgunean eta proiektuarekin lotutako euskarrietan argitaratzeko baimena emateko. Hilaren 30a baino lehen bidali beharko dira datu guztiak helbide elektroniko honetara.
