Hondarribia eremu tentsionatu izateko prozedura abiatu du udalak
Diagnostikoa eta ekintza plana aurkeztu ditu Hondarribiko Udalak, eta orain, herritarren proposamenak jasoko ditu, apirilaren 13ra arte.
Hondarribiko Udalak udalerria bizitegi merkatu tentsionatuko eremu izendatzeko prozedura hasi du. Lehenengo urratsa herritarren proposamenak jasotzea izango da, eta horretarako diagnostikoa eta ekintza plana ahalbidetuko ditu udalak. Proposamenak eta oharrak egiteko aukera apirilaren 13ra arte luzatu dute.
“Udalaren asmoa da Hondarribia Etxebizitza Merkatu Tentsionatuko Eremu izendatzeko eskaera lehenbailehen formalizatzea, etxebizitza-merkatuan esku hartzeko tresnak aktibatu eta herritarrei etxebizitza eskuragarriagoa bermatzeko”, azaldu du udalak ohar bidez.
Diagnostikoaren harira, GISLANek ezarritako hiru irizpideetatik bi betetzen ditu. Diagnostiko horrek ondorioztatu du etxebizitzaren prezioen igoera eta herritarren erosahalmena gero eta desorekatuagoak daudela. “2018 eta 2023 artean alokairuaren batez besteko prezioa %19,7 igo da; hau da, KPIaren metatutako igoera (%16,5) baino 3,2 puntu gehiago”.
Irizpideak beteta, praktikan alokairuen prezioak mugatuko lituzke eremu tentsionatuaren izendapenak. Funtsean, alokairuaren gehiegizko prezioagatik, herritarrek haien errentaren zati handiegi bat bideratu behar dute horretara, eta izendapenarekin, udaletxeak lanabesak edukiko lituzke hori bera mugatzeko.
Ekintza plana prest
Diagnostikoarekin batera, ekintza plana aurkeztu du Hondarribiko Udalak. Bi txosten horien herritarren proposamenak jaso ondoren, Udal gobernuak behin betiko dokumentua prestatu eta Tokiko Gobernu Batzarrak onartu ondoren, Eusko Jaurlaritzari bidaliko dio, dagokion dekretua eman dezan.
Hurrengo astean sakonago landuko du HITZAk gaia.
