Marlaxka Xake Klubeko emakumeek Eihartze Buiza izan dute erreferente
Maila altuko jokalaria da bizkaitarra, eta hainbat garaipen ditu zorroan. Kolokio bat eskaini zuen astelehenean Kasino Zaharrean.
Marlaxka Xake Klubak eta Emeki emakumeen taldeak harreman estua dutela erakusten jarraitzen dute. Martxoak 8ko egitarauaren barnean, urtero moduan xake ttopara egin zuten, baina hori ez ezik, kirolaren inguruan bildu ziren emakumeak astelehenean ere. Eihartze Buiza xake jokalaria gonbidatu zuten, kolokio bat ematera.
Kasino Zaharrean elkartu ziren. Buiza ez da nolanahiko jokalaria. “Bizkaiko eta Euskadiko txapelketak, Espainiako sub-16 eta sub-18 txapelketetan bigarren postua, Espainiako emakumezko absolutuaren hirugarren postua, eta duela pare bat urte Espainiako laugarren postua eta Iberoamerikako txapelketan bigarren postua lortu zituen. Gainera, bere ibilbidea Nafarroako emakumezko promesak prestatzen konbinatzen du”, azaldu dute Marlaxka Xake Klubetik.
Beraz, Buizaren esperientziaz baliaturik, bertaratutakoek hainbat galdera egin zizkioten. “ELOari, joko erritmoei, txapelketen motari, baita porrotei eta nerbioei nola aurre egiteari buruz galdetu zioten. Horrez gain, xakean emakumeen aurkako jokabide matxistaz mintzatu ziren”. 26 urteko xake jokalariak galderak erantzun zituen, eta bere bizipenez mintzatu zen. Lau urterekin hasi zen xakean, eta azaldu zuen “nola pasio honek bere bizitza bete egiten duen oraindik”.
Marlaxka klubak ekitaldi honekin emakumezkoen talentua eta kirolean berdintasunaren aldeko borroka aitortu nahi izan ditu, aurreko urteetako omenaldiak jarraituz. “Kolokioa giro hurbileko eta aberasgarria izan da, eta erakusten du xakea tresna ezin hobea dela inspiratzeko, hezteko eta berdintasunaren alde aurrera egiteko”, azaldu dute. Aurkezpena egin ostean, Eihartzek argazki batzuk erakutsi zituen, bere jokalari ibilbideko une garrantzitsuenak erakutsiz: txapelketak, bidaiak eta oroitzapenak. “Horrek aurkezpenaren ostean sortu zen galderak egiteko tartea lagundu zuen”.
Erreferenteak sortzea
Xake eskolako koordinatzaile Goio Uriarteren ustez, horrelako ekitaldiak funtsezkoak dira erreferenteak sortzeko. ““Xakean, pieza bakoitzak bere balioa eta momentua du, eta gure klubak nahi du neska guztiek taulako protagonista izan daitezkeela jakin dezaten”, esan du Uriartek.
Kolokioarekin amaitzeko, klubeko jokalari den Nora Lera Cuñadok lore sorta bat eman zion Buizari. Horrez gain, bertaratutako denek sinatutako txartel bat eta omenaldi moduan egindako plaka bat eman zizkioten, haien eskerrak erakutsiz.
Marlaxka Xake Klubak ateratako argazkiak:
