Bioterra azoka ekologikoak 20. urteurrena izango du
Ekainaren 5etik 7ra, Ficoba bizimodu ekologikoaren topagune izango da, eta aurtengo ardatza bizimodu ekologikoa eta osasungarria izango da.
Ficobak baditu urtetik urtera hutsik egiten ez duten hitzorduak. Bioterra da horietako bat, eta ekainaren 5etik 7ra bitarte, 20. urteurrena ospatuko dute. Azoka ekologista ez da bakarrik azoka soil bat, komunitate bat sortu du. “Bizimodu ekologikoagoa, kontzienteagoa eta planetarekiko adeitsuagoa den bizimoduaren alde egin nahi duten pertsonen topagunea da”. Aurtengo ardatza bizimodu ekologikoa eta osasungarria izango da, eta etorkizunerako bidea eraikitzen hasiko dira.
Azokak jasangarritasuna, ingurumenarekiko kontzientzia, osasuna eta ongizatea modu koherentean uztartuko ditu. Aurten, arreta berezia eskainiko diote ongizateari, hain zuzen, osasun integralari, elikadura kontzienteari, zahartze aktiboari, bizitzaren luzerari eta oreka emozionalari. Eredu ekologikoak gora egin du azken urteotan, eta Ekolurrak argitaratatutako 2025eko balantzean argi dute nekazaritza ekologikoa etorkizuneko elikadura eredua dela. “Agroekologia etorkizuna da”.
Etorkizunerako ikuspegi horrekin batera, Bioterrak Hope! Estamos a tiempo dokuseriea proiektatuko du. Hainbat herrialdetan ezartzen ari diren benetako konponbideak erakusten ditu, adituen elkarrizketen eta istorioen bitartez. Serieak ikuspegi itxaropentsu baina pragmatikoa igortzen du, “oraindik zeozer egin dezakegu”. Sei kapitulu izango ditu, eta lehenengo hiru kapituluak azoka hasi baino lehenago proiektatuko dituzte; beste hiruak, berriz, Ficoban bertan azoka egunetan. Proposamen honek bat egiten du azokaren balioekin, konponbideak badaudela erakusten baitu eta abian dagoen aldaketa ere ikusarazten du.
