Irungo auzoak elkarlanean bilduko ditu Korrikak
Auzo elkarte guztiak bildu eta Korrikaren eguna ospatuko dute martxoaren 21ean. San Juan plazan egingo dute ospakizuna, baina auzo guztietatik egingo dira bertaratzeko zutabeak.
Irungo Korrika eguna aurkeztu dute, eta lehen aldiz, hiriko auzo elkarte guztiak elkartuko dira. AEKren ekimenez, Korrika Irundik pasako da, martxoaren 24ean, goizeko ordu txikietan. Baina Korrika pasako den egunaz gain, ekitaldi gehiago egingo dira euskararen aldeko egitasmoaren harira. Horien artean, Korrika eguna. Martxoaren 21ean izango da Korrika eguna, eta AEK bultzatuta izan arren, hainbat eragilek parte hartu dute eguna prestatzen, auzo elkarteek bereziki.
Irungo erdiguneko auzo elkartean egin dute aurkezpena. “Lehenengo aldiz egindako lankidetza izan da, AEKren eta auzo elkarteen artekoa. Uste baino hobe joan da dena, eta fruitu ederrak jaso ditugu”, azaldu du Maddi Sanz Bidasoko Korrika arduradunak. Duela bi urte Korrika Irundik atera zen, eta horren harira asko ikasi zutela diote AEKko kideek. Aurten, beste antolakuntza mota batean pentsatu behar izan dute, xumeagoa agian. “Auzo elkarteek inoiz baino presentzia gehiago izango dute”.
Auzo elkarteen aldetik, oso positibotzat jo dute egindako elkarlana. “Urte askoz hainbat auzo elkarteek euskararen aldeko egitasmo ezberdinak egin ditugu, hala nola Euskaraldiaren harira, euskararen egunean edo duela bi urteko Korrikan. Guk oso argi dugu auzoak eremu aproposak direla euskara jorratzeko”, adierazi du Mikel Valerok, Larreaundi-Olaberriako auzo elkarteko kideak. Auzoen garrantzia nabarmendu nahi izan du elkartekideak: “Irunek auzoetan funtzionatzen du, eta auzo asko gara. Gainera, auzo guztietan auzo elkarteak ditugu, eta auzo komunitatea oso indartsua da”.
Hiru zutabe
Dagoen mugimendua aprobetxatzeko, Korrika egunaren oinarria izango dira auzoak. Hainbat zutabe antolatuko dira, auzoak elkartzeko eta denak pixkanaka erdigunera bideratzeko, San Juan plazara. “Auzoetan gauzak antolatuko ditugu lehenagotik, eta ondoren, elkarrekin, batera joango gara. Irungo auzo elkarteak hor gaude, baina elkarrekin gauza gutxi egiten ditugu. Arrakasta handia da egin duguna egitea, denak elkartzea. Esango nuke lehen aldia dela horrelako zerbait egiten dugula”, esan du Valerok.
Hiru zutabe antolatuko dira. Lehenengoa: Landetxa, Belaskoenea, Oñaurre eta Lapitze. Bigarrena: Urdanibia berri, Anaka, Puiana, San Migel, Antzaran, Piñudi eta Erdigunea. Hirugarrena: Artia, Behobia, Dunboa eta Santiago. “Asmoa da 13:30earako hiru zutabeak San Juanen biltzea, eta bertan eguna luzatuko dugu. Egunaren programazio osoa hurrengo egunetan aurkeztuko dugu”.
