Muturen omenezko babarrunak
Igandean egingo dute Hondarribiko III. Babarrun Lehiaketa. Herriko elkarteak lehiatuko dira, herriko babarrunekin.
Hondarribiko baserrietako babarrunak erabiliko dira igandean, Hondarribiko III. Babarrun Lehiaketan. Zumardikoak elkarteak abiatu zuen lehiaketa duela hiru urte, Jose Ramon Mutuberria Mutu-ren ekimenez. Zoritxarrez, iaz zendu zen Mutu, baina bere elkartekideek omenaldi goxoa eskaini nahi izan diote, bere lehiaketarekin aurrera jarraituz. Igandean egingo dute, 09:00etatik aurrera, eta herriko elkarte gastronomikoak izango dira lehian.
Hamahiru baserritako babarrunak erabiliko dituzte partaideek. “Hamasei elkarte ditugu herrian, eta oraingoz hamark eman dute izena lehiaketan”, azaldu du Jaizkibel Tovar Zumardikoak elkarteko kideak. Elkarte partaideak, oraingoz, hurrengoak dira: Zumardikoak, Klink, Goxoki, Nautico, Alkartasuna, Itsas Etxea, Txanpa, Azeri, Marlaxka, HKT. Batzuek bi lapiko egingo dituzte, eta gero, denekin, herri bazkaria egingo dute. Partaideek ez dute jakingo ze baserriko leikua edukiko duten, kozinatzen hasi arte.
Hurrengo baserrietako lehengaiak erabiliko dira: Patxirenea, Gornutz, Bottikako Agroaldea, Mikelenea, Legia, Lujunea, Tudelenea, Zigarrenea, Errandazahar eta Botika.
Epaimahai osatua
Epaimahaia osatzeko, hainbat pertsonarekin egin du kontaktua Zumardikoak elkarteak. Josema Azpeitia (gastronomia kazetaria eta Ondojan aldizkariaren sortzailea), Maritxu Lapitz (Ziburuko Ttoro Kofradiako kidea), Maite Otaño (nekazaria eta Gipuzkoako Landagile eta Baratzzgile Elkarteko presidentea), eta Juanma Garmendia (Gastronomia Kofradien Federazioko presidentea). “Epaimahaiak hainbat alderdi hartuko ditu kontuan balorazioa egiteko, besteak beste babarrunaren kalitatea, egosketa-puntua, zaporea eta plateraren prestaketa”, esan dute Zumardikoek.
Hiru ordu eta erdi izango dituzte partaideek haien babarrunak egiteko. 09:00etan hasi eta 12:30ean aurkeztu beharko dute lapikoa epaimahaiaren aurrean. Igandean urte bat beteko da Mutu zendu zenetik, eta bere inguruan pertsona oso maitatua zein heinean, emozio handiarekin hartuko dute Zumardikoek ekitaldia.
