Oinaurreko osasun zentroa, hurbilago
Osakidetzak osasun zentro berriaren plan funtzionala onartu du, eta Irungo Udalari lur zatia lagatzeko eskaera egin dio.
Oinaurreko Arrabatenea kalean (irudiko, berdegunean) egingo dute osasun zentro berria.Irekia Osakidetzak jakinarazi du Oinaurreko osasun zentro berriaren egitasmoan aurrera urratsak egin dituela. Batetik, osasun azpiegituraren plan funtzionala onartu du, eta proiektua idazteko azken urratsekin dabil aurki aterako duelako horren lizitazioa. Horrekin lotuta, Eusko Jaurlaritzak zentroa joango den lur sailaren lagapen eskaera egion dio Irungo Udalari, erregistro bidez.
Eusko Jaurlaritzak eta Osakidetzak zehaztu dute osasun zentro berria osoki gauzatzeko 11,2 milioi euroko inbertsioa egingo dela, eta 25.000 irundarri emango diela zerbitzu. Obren hasiera 2027aren bukaerarako ezarri dute, eta bi urteko epean horiek egikaritzea espero dute. Beraz, 2029aren bukaeran edo 2030aren hasiera martxan legoke Oinaurreko osasun zentroa. 7.200 metro koadroko saila behar da osasun azpiegiturarako: Belaskoenea, Elitxu-Lapitze, Urdanibia Berria, Anaka eta Katea auzoko biztanleei emango die zerbitzu.
Xehetasun gehiago eman dituzte Jaurlaritzak eta Osakidetzak. Oinaurren medikuntza pediatrikoko 10 kontsulta izango direla esan dute, erizaintza, emagin eta ginekologia zerbitzuekin. Familien arta orokorrerako 27 kontsula izango dira aldi berean. Gainera, erabilera anitzeko eremuan, proba funtzionaletarako lau kontsulta, sendaketa gela eta larrialdiak izango dira. Kanpoko kontsulten eremuan optometriako lau gela eta askotariko kontsulten aretoa iragarri dituzte.
Oinaurrekoaz gainera, Osakidetzak beste bi azpiegituraren berri eman du. Batetik, Alarde kaleko Irun Berria osasun zentro berria egitea, eta bestetik, Alarde kaleko lehen mailako arretako errefortzu zentroa egokitzea. Gainera, Bidasoko Ospitalean bloke kirurgiko berriko lanak abioan dira.
Datuak eman dituzte Jaurlaritzak eta Osakidetzak, Bidasoan egitekoak diren inbertsioenak zehazki: Bidasoko ESIaren plan integralaren barruan 51,2 milioi euroko inbertsioa iragarri dute, horrela banatuta:
- 23 milioi euro Bidasoa Ospitaleko bloke kirurgikorako.
- 11,2 milioi euro Oinaurreko osasun zentro berria egiteko.
- 16 milioi euro Irun Berria osasun zentroa egiteko.
- Milioi bat euro Alarde kaleko lehen ailako arretako errefortzu zentroa egokitzeko.
