Feminismoaren indar kolektiboa aktibatzeko topaketa
Feminismoa ardatz izango duen Emakume Elkarteen Topaketa Irekia egingo dute hilaren 11n (asteazkena) Irunen, 18:30ean hasita, Emakumeen Etxean.
Oihana Llorente, Olga Rivas, Ane Toledo eta Pilar Grazenea, topaketaren aurkezpenean. Feminismoa ardatz izango duen Emakume Elkarteen Topaketa Irekia egingo dute hilaren 11n (asteazkena) Irunen, 18:30ean hasita, Emakumeen Etxean, “emakume taldeak sarean konektatzeko eta indar kolektiboa aktibatzeko helburuarekin”. Gaur aurkeztuko dute topaketa, Emakumeen Etxean bertan, Pilar Grazeneak, Oihana Llorentek, Olga Rivasek eta Ane Toledok.
Indar kolektibo hori aktibatzeko lehen urratsa oso esanguratsua izan da, eta horren erakusle da bilgunea antolatzeko hautua egin duten eragileen zerrenda: Kera Emakume Ijitoen Elkartea, Lumak Haize Irungo LGTBIQ+ pertsonen taldea, Txingudiko Elkarte Feminista, Argoiak elkartea, Emakumeen Etxea elkartea, Bidasoaldeko Elkarte Feminista, Hara!Gorputz hilekoaren kulturatik eta ekofeminismotik sortutako elkarte kooperatiboa, eta Parean elkartea. “Elkarte hauek guztiek gure jarduna aurkezteko tartea izango dugu, eta ditugun lan ildo nagusiak partekatuko ditugu. Solasaldirako eta elkar ezagutzeko gune atsegina ere sortuko dugu”.
Proposamena abiapuntua irudi sinboliko bat da, emakumeen elkartez ostutako unibertso batena, “non elkarte bakoitzak nortasuna duen planeta bat den”. Sare konektatu eta sendoa ehuntzen jarraitzeko indar kolektiboa, joera indibidualaren gainetik kokatu nahi dute. “Uste dugu elkarlanetik eta elkar ezagutzatik sortzen direla eraldaketa sozialerako aukerarik eraginkorrenak. Horregatik, emakumeen elkarte guztiak eta interesa duen oro gonbidatzen ditugu bertara”.
Feminismoa ardatz duen komunitate bizi eta indartsua eraikitzen jarraitu nahi dute. “Ez da bakarrik gure barrura begirako jarduera izango, badela ere; baizik eta herritarrez lagunduta egin nahi dugun elkar ezagutza ariketa bat da. Aforoa bete arte bertara daitezela herritar guztiak”.
