Indarkeria matxistaren aurka literatura ere badelako arma
Asun Casasola Ipuin Lehiaketako sariak banatu zituzten atzo, Kabigorrin. Bertako elkartasuna eta borrokarako grina nabarmendu ziren.
Beste urte batez, Asun Casasola Ipuin Lehiaketako garaileak aurkeztu zituzten atzo, Kabigorri ateneoan egindako ekitaldian. Ipuin laburrez osaturiko lehiaketak lau irabazle izan zituen, bi euskarazko gazte eta helduen mailan, eta beste bi gaztelaniazko ataletan. 2013. urtetik egiten dute lehiaketa, eta hainbat irabazle izan dira bertan. Batzuk, aldiz, errepikatu egin dute lehen saria, aurtengo bi irabazlek moduan. “Aurtengo gaia indarkeria matxista bere horretan izango da. Gai zabala eta konplexua dela badakigu, baina aldi berean gaiak izan ditzakeen adiera guztiak ongi etorriak izango dira. Gai nahiko irekia izan nahi du aurtengoak beraz”, adierazten zen lehiaketaren oinarrietan.
Nerea Sarriegi eta Joana Ochoteco kazetariek egin zituzten aurkezle lanak. “Beste urte batez hemen gaude, eta beti bezala, oso pozik. Hemen zaudeten askok hasieratik lagundu gaituzue, eta hori eskertzekoa da”, azaldu zuten kazetariek.
Gazteen lehiaketan hainbat eskolek parte hartze aktiboa izan dute, haien ikasleak parte hartzera animatu dituzte. Gazteen mailan, euskarazko saria Toki Alai ikastetxeko Elaia Arbelaitzek irabazi du, eta gaztelerazkoa Yuri Torres bilbotarrak. “Ez nuen asmorik parte hartzeko, printzipioz idazlana eskolako proiektu bat zen eta. Baina eskolan animatu egin zidaten, eta oso eskertua nago horregatik. Eskerrak eman nahi ditut, bai nire ingurukoei eta baita ere lehiaketaren antolatzaileei”, adierazi zuen Arbelaitzek.
Aletxoa jartzen
Helduen mailan, aldiz, bi errepikapen izan dira, hau da, bi irabazleek lehenagotik irabazi izan dute Asun Casasola Ipuin Laburren Lehiaketa. Euskarazko testuetan Iraitz Legarra markindarra gailendu da, eta gaztelerazkoetan Isabel Perez madrildarra. “Gai honen inguruan denok elkartzea gauza garrantzitsua da. Literaturaren bitartez, gure aletxoa jartzeko aukera izan dugu, gaiak oihartzuna izan dezan”, esan zuen Legarrak.
Casasolak berak ere eskerrak eman nahi izan zituen atzoko ekitaldian. “Oso eskertua nago hau dena antolatzen dutenei. Oso garrantzitsua da ikusaraztea arazo handi bat dugula gizartean. Ni ez nintzen konturatzen tokatu zitzaidan arte, baina orain badakit, eta horren aurka borrokatzea beharrezkoa ikusten dut”. Elkartasunean ospatu zuten hitzordua bertaratutako guztiek, eta seguru aski, hurrengo urtean berriro ere biltzeko ideiarekin iritsi ziren etxera protagonistak.
Hona hemen atzo HITZAk ateratako argazkiak:
