Osasun mentala, bigarren planotik at
Osasun mentalaren alde bildu dira Hondarribian. Eskualdeko familiek deituriko mobilizazioan ehunka pertsona bildu ziren, aldarrikapenek kaleak hartzeko xedearekin.
Osasun mentalaren alde elkartu ziren atzo Hondarribian. “Eskualdeko familiak elkartu egin gara, nahikoa da esan dugu. Kalera ateratzea beharrezkoa dugu, osasun mentala bigarren planoko zerbait moduan kudeatu baita urte askotan zehar”, adierazi zuen Igor Medranok, batutako familien izenean. Aurreko astean Osasun Bidasoa plataformak atzoko manifestaziorako atxikimendua erakutsi zuen, baina mobilizazioaren antolatzaileek argi utzi nahi izan dute familiek sustatutako zerbait izan dela. 12:00tan hasi zen martxa Martxoak 8 plazan.
Egun eguzkitsua izan zuten atzo. Portua auzotik egin zen martxa, eta bertan ehunka pertsona bildu ziren. “Mobilizazio arrakastatsua” izan zela zioten antolatzaileek, eta oso eskertuak agertu ziren laguntza eskaini zietenen aurrean. Familien eskakizun nagusia osasun mentalari merezi duen garrantzia ematean datza, haien ustez gainbeheran dagoen zerbitzu bat baita. Azaldu zuten nola onartezina den gaur egun osasun mentalaren zerbitzua ematen duten osasun zentroetan gazteak eta helduak nahasten dituzten, eta nola haien intimitatea urratzen den, itxaron gelatik kontsulta barneko guztia entzuten baita.
“Hitzik izan ez dutenen izenean ibiltzera goaz”, esan zuten ibilaldia hasi baino lehen. Ondoren ere, amaitzeko, hainbat hitz hartze izan ziren. Haien artean, Sara Mariezkurrena psikologoak azaldu zuen oso garrantzitsua dela arazoaren sortzaileak seinalatzea eta kalera ateratzea, eskubideak aldarrikatzeko. “Askotan planteatzen zaigun soluzioa zerbitzu pribatuak kontratatzea da, eta hori gehienontzat ezinezkoa da. Horregatik osasun zerbitzua doakoa eta denontzakoa izan behar da”.
Txalo artean amaitu zuten eguna. Gogorarazi nahi izan zuten Osasun Bidasoak hainbat mobilizazio dituela prestatuak martxoarako. Data guztiak hemen.
Hona hemen atzo HITZAk ateratako argazkiak.
