Hondarribia Sormen Hiria bekak eska daitezke
Interesdunek gaurtik martxoaren 27ra bitartean aurkeztu ahal izango dituzte eskaerak. Udalak hainbat diziplinatako lanak onartuko ditu.
Hondarribiko Udaleko Kultura Sailak Hondarribia Sormen Hiria beken eskaerak aurkezteko epea zabaldu duela jakinarazi du. Interesdunek gaurtik martxoaren 27ra bitartean aurkeztu ahal izango dituzte eskaerak.
Iaz udal gobernu taldeak lehentasuna eman zion hamarkada bat baino gehiago jarduerarik gabe zeraman Artista Beka egitasmoa berreskuratzeari, eta aurten jarraipena emango dio iniziatiba horri. Deialdiaren bidez, arte sorkuntza sustatu nahi dela adierazi du udalak, eta gehienez 13.121,10 euro bideratuko dira horretarako.
Udalak hainbat diziplinatako lanak onartuko dituela aurreratu du: pintura, eskultura, obra grafikoa, argazkigintza, ikus-entzunezkoak, zinemagintza, komikigintza, arte eszenikoak, musika eta konposizio digitala.
Bekak adierazitako arloetan diharduten pertsona fisikoek eskatu ahal izango dituzte, baldin eta artean jardun nahi badute eta azken hiru urteetan Hondarribiko Udalarengandik jarduera horretarako bekarik jaso ez badute. Eskaera egiteko, beharrezkoa izango da Hondarribian jaiotakoa izatea ego gutxienez hamar urtez udalerrian bizi izatea.
Eskaerak BAZen bidez edo udalaren webguneko Sarrera Erregistro Elektronikoaren bitartez aurkeztu beharko dira. Deialdiaren gaineko xehetasun guztiak udal webgunean kontsulta daitezke.
