Udal Euskaltegian izena emateko epea astelehenean irekiko dute
Ikastaro trinkoak apirilaren 13tik ekainaren 19ra izango dira, eta interesdunek martxoaren 13ra arte dute izena emateko epea.
Irungo Udal Euskaltegian izena emateko aukera izango dute datorren astean, matrikulazio epe berria irekiko dute eta. Apirila eta ekaina bitarte, euskara ikasteko ikastaro trinkoa egingo dute Udal Euskaltegian. Martxoaren 2tik 13ra ikastaroan izena emateko tartea izango dute interesdunek, eskaria Udalaren Egoitza Elektronikoan egin beharko dute. Behin izen ematearen eskaera eginda, mailaketa proba egin beharko dute. Proba egiteko hitzordua eskatzeko 943 50 52 73 telefonora deitu beharko dute.
“Ikastaro honen bitartez, ikasleek euskara ikasteko dituzten behar pertsonaletara egokitzeko aukera izango dute”, hala adierazi du Sandra Caballerok, Hezkuntza arloko ordezkariak. Apirilaren 13an hasi eta ekainaren 19ra arte izango da ikastaroa, eta egunero lau orduko klaseak izango ditu, 09:00etatik 13.15era.
LANNAHI egitasmoaren onuradunek 20 euro ordaindu beharko dituzte ikastaro trinko bakoitzeko.
