Sanpedro eta Sanmartzialak prestatzen hasi dira
Martxoaren 13ra bitarte, Sanpedrotan eta Sanmartzialetan txosnak jartzeko eskaera egin dezakete interesdunek.
Aurtengo Sanpedroak eta Sanmartzialak dagoeneko prestatzen hasi dira. Martxoaren 13ra bitarte, ostiralarekin, Irungo elkarteek edota taldeek aurtengo festetan txosnak jartzeko eskaera egin dezakete. Txosnak urtero lez, Urdanibia plazan jarriko dituzte; guztira, sei izango dira. Kultur, kirol eta aisialdi irabazi asmorik gabeko elkarteek, Irungo ikastetxeetako Lanbide Hezaiketako, Batxilergoko institutuetako eta Helduen Hezkuntza Ikastetxeetako ikasleek izena emateko aukera izango dute.
Izena emateko irabazi asmorik gabeko elkarteek hainbat baldintza bete beharko dituzte: indarreko legediaren arabera eratuak izatea, EAEko Elkarteen Erregistro Orokorrean inskribatuta egotea eta azkenengo bi urteetan gutxienez Irunen jardutea. Betiere, elkarte hauek egoitza soziala Irunen izan behar dute.
Martxoaren 13an izena emateko epea bukatzen denean, prozesua itxi eta martxoaren 18an onartzen diren eskaeren behin-behineko zerrenda argitaratuko dute. Zozketa publikoa martxoaren 26an egingo dute, Amaia KZko hitzaldi aretoan. 19:00etan hasi, eta eskatzaile bakoitzaren ordezkari bat bertan egon beharko du.
