Bidasoa Itzulia, aurten azkenean bai
Urtarrilean txirrindularitza proba bertan behera uzteko erabakiarekin atzera egin, eta azkenean bai: aurten Bidasoa Itzulia izango da.
Aurten, azkenean, Bidasoa Itzulia egingo da. 2026an ez du etenik izango, beraz. Hala konfirmatu dute probaren antolatzaile diren Bidasoa Itzulia Kirol Elkarteko kideek. Urtarrilaren bukaeran prentsa ohar bidez iragarri zuten antolatzaileek ez zela egingo 2026ko Bidasoa Itzulia, bideragarritasun ekonomikoa ez zuelako ziurtatua. Baina erabakiarekin atzera egin dute, berri pozgarria Bidasoko txirrindularitzarentzat: “Prentsa oharra atera eta gero guregana hainbat erakunde hurbildu ziren Bidasoa Itzuliaren egoeragatik kezkatuta. Guk azaldu genuen lanean jarri nahi genuela 2027an lasterketa berreskuratzeko. Hauen artean proposamen sendo bat jaso genuen Gipuzkoako Txirrindularitza Federazioarengandik elkarlanean jartzeko berriz ere 2026ko edizioa martxan”. Proposamena ontzat eman, eta aurrera egin dute.
Oraindik informazio zehatzagorik emateko moduan ez direla azaldu dute antolatzaileek. Baina arlo bat behin betiko erabakitzat eman dute, datena. Urtarrileko ukoaren aurretik ezarritako datetan egingo da 2026ko Bidasoa Itzulia, hau da, maiatzaren 8tik 10era. Aurrerago emango dituzte bestelako xehetasun teknikoak.
Federazioaren proposamenari heldu, eta makineria osoa martxan dute antolatzaileek. 2027ari begira aurtengoz albora utzitako hura berraktibatu dute. “Lasterketa aurrera ateratzeko ahalegin honetan elkarrekin ari gara lanean Bidasoa Itzulia Kirol Elkartea; Bidasoa-Txingudi Partzuergoa; Gipuzkoako Txirrindularitza Federazioa; Gipuzkoako Foru Aldundia; Hendaia, Hondarribia eta Irungo udalak; eta Irungo Txirrindulari Elkartea. Noski, lasterketa berrindartzen ari diren eta gurekin lanean jarraitzen duten babesle pribatuei esker hau aurrera goaz”, azaldu dute antolatzaileek.
