30 euro gastatuz, 10 euroko deskontua jasoko dute hondarribiarrek
Merkataritza bonoen kanpaina jarri du abian Hondarribiko Udalak. Herritarrek herrian erostea du helburu, bertako komertzioak sustatuz.
Abian dira merkataritza bonoak. 18 gorako edozein hondarribiarrek 10 euroko deskontua bereganatuko dute 30 eurotik gorako erosketa bat egitean, bono kanpainan atxiki diren 40 komertzioetan. Hori bai, herrian erroldatuta egon beharko da erabiltzailea. Gogo handiz hartu dute kanpaina, Estitxu Urtizberea Merkataritza zinegotziak azaldu duenez, herritarrek herrian kontsumitzea baita helburua. Martxoaren 2tik apirilaren 1eraino iraungo du kanpainak.
Herritar bakoitzak hiru bono izango ditu, eta bono bakoitza 10 eurokoa izango da. Guztira 6.355 bono jarriko dituzte eskura, eta beraz, 63.550 euroko kanpaina izango da. “Aurten, bono bakoitza komertzio ezberdin batean erabili beharko da. Horrela, komertzioen arteko mugikortasuna sustatzea dugu helburu”. Erosketak egiterakoan, bonoak eskatu egin beharko dira, eta NANa erakutsiz, nahikoa da deskontua jasotzeko.
Atxikitutako komertzioak ikusteko, egin klik hemen.
Iaz bi txandetan antolatu zuten bono kanpaina. Abenduan egiten ziren erosketekin, udaberrian kanjeatzeko bonoak banatu ziren, baina Urtizbereak adierazi du komertzioekin hausnarketa eginda, uste dutela hobe dela dena txanda batean egitea. “Gobernu talde honentzat tokiko merkataritza sustatzea oso garrantzitsua da. Komunitatea egiten dugu horrela, kaleak biziz betetzen ditugu eta herri kohesionatuago bat lortzen laguntzen digu”, azaldu du zinegotziak.
Kontsumo ohiturak aldatzea
Esti Rubio Nautica Hiruarri komertzioko langileak adierazi du jendea gogotsu dagoela bonoak jasotzeko. “Aurreztu daitekeen heinean, ongi datoz horrelako kanpainak. Jendeak itxoin egiten du bonoak ateratzera, erosketak egiteko”. Azken finean, Rubioren ustez, garrantzitsuena herriko jendeak herrian erostea dela, eta horregatik sustatu behar direla horrelako kanpainak.
Merkataritza eta zerbitzuen tokiko biziberritze plana onartu du duela gutxi udal gobernuak, eta hor bertan, herriko kontsumo ohituren azterketa bat egin dute. “Azterketan ikusi dugu gastu ihesa oso handia dela, hau da, bertako bizilagunek gehiago erosten dugula kanpoan. Fenomeno horri buelta ematea da bono kanpaina abian jartzeko beste arrazoi bat, hau da, bertakoak bertan eros dezala eta ohitura hori barnera dezala”. Azaldu dutenez, komertzio anitz asko atxiki dira kanpainara, era guztietakoak. Kanpaina osatzerakoan, arrantza mundua erabili dute iruditegia osatzeko, eta leloak jartzerakoan, herriko hizkera lehenetsi dute.
