"Elkartasuna ez da delitua"
2024ko Korrikan migratzaileak Ipar Euskal Herrira pasaraztea leporatzen zieten zazpi militanteak aste honetan absolbitu dituzte. Gaur elkarretaratzea egin dute, harrera herri izaera aldarrikatzeko.
Abenida zubiaren Hendaiako aldean elkartu dira Korrikaren harira migratzaileak Irundik Hendaiara pasatzen lagundu zituzten auzipetuak. Aste honetan, Baionako epaitegietako epaile batek kargu gabe utzi ditu, baina harrera herri izaeraren alde borrokan jarraitzeko grina erakutsi dute.
“Otsailaren 17an, Baionako auzitegiak arrazoia eman zigun. 2024ko martxoko Korrikan egindako ekintzagatik auzipetutako pertsonen erabateko errugabetzea iragarri zuen, hain zuzen, onartu eta ulertu zitekeen epai bakarra”, adierazi dute bozeramaileek. Premisa argia da: elkartasuna ez da delitua.
Zazpi militante eseri ziren epaitegian, baina haien ustez, “gizarte oso baten garaipena da” aste honetan izandakoa. Eskerrak emateko probestu dute elkarretaratzea. Deklaratzera hurbildutako pertsona ezagunak aipatu dituzte, hala nola, Filipe Aramendi Urruñako alkatea, Damien Careme eurodiputatua eta Claire Rodier Gistiko legelaria. Baina ezagunei ez ezik, hurbilean egondako guztiei eman dizkiete eskerrak. “Elkartasuna eskertzen dugu. Oraindik sinetsita gara berak eman digula irabazteko aukera”.
“Zorionak guztioi”
Euskal Herria harrera herria dela eta izan behar dela aldarrikatu dute. “Pertsona eta eskubide guztiak defendatzen jarraituko dugu”. Arrazoi politikoek edo ekonomikoek bultzatuta migratzen dute pertsona askok, “bazterketa eta indarkeria eragiten duen sistema kapitalista eta kolonial baten ondorioak jasaten dituzte”.
Arazoa ez ahazteko, horma mural bat egin dute Abenida zubiko alde lapurtarrean.
“Ez da abiapuntua, ezta amaiera ere”.
“Zorionak guztioi”.
“Elkartasuna ez da delitua, elkartasuna gure indarra da”.
